ՀՀ ԱԺ պաշտպանության եւ անվտանգության հարցերի մշտական հանձնաժողովը մարտի 15-ի հերթական նիստում քննարկել է ՀՀ Կառավարության 2022թ. փետրվարի 28-ի «ՀՀ Կառավարության ծրագրի (2021-2026 թթ.) 2021 թվականի կատարման ընթացքի եւ արդյունքների զեկույցի մասին» N 234-Ա որոշմամբ հավանության արժանացած զեկույցը:
ՀՀ արտակարգ իրավիճակների նախարար Անդրանիկ Փիլոյանը ներկայացրել է հաշվետու ժամանակահատվածում նախարարության իրականացրած աշխատանքները: Նրա խոսքով` գործող 7 կամավորական հրշեջ փրկարարական հենակետերը համալրվել են եւս 3-ով: Հրշեջ ավտոմեքենաներ են հատկացվել Սյունիքի մարզի Շուռնուխ, Կոռնիձոր եւ Շիկահող համայնքներում ձեւավորված հրշեջ փրկարարական եւ կամավորական հրշեջ փրկարարական հենակետերին: Առաջիկայում նման մեկ մեքենա եւս կհատկացվի Կոռնիձոր համայնքին: Կամավորները ստացել են փրկարարի կարգավիճակ, իսկ գործող 10 հենակետերին հատկացվել է մեկական մեքենա:
2021թ. մարզերում եւ Երեւանում տեղադրվել են 203 նոր էլեկտրական շչակներ, վերանորոգվել է 224-ը: 1.003 էլեկտարական շչակներից այսօր սարքին վիճակում է 961-ը,մինչդեռ 2021թ. սարքին է եղել 485 շչակ: Հանրապետությանն այսօր անհրաժեշտ է 1.544 էլեկտրական շչակ:
Իրականացվել են նաեւ ապաստարանների վիճակի ուսումնասիրություններ. այս մասով տվյալները հանձնաժողովին կներկայացվեն փակ ընթացակարգով: Ուսումնասիրվել են շենք-շինությունների նկուղային հարկերը, համապատասխան մարմիններին ներկայացվել են առաջարկություններ:
Նախարարությունն աշխատանքներ է իրականացրել նաեւ հումանիտար արձագանքման ուղղությամբ` համատեղելով աշխատանքը համապատասխան կառույցի հետ: Այսպես, 2021թ. հունիսի 1-ից մինչեւ դեկտեմբերի 15-ը հոգեբանական աջակցության ծառայություն է մատուցվել 1.358 շահառուի, այդ նպատակով ամբողջությամբ օգտագործվել է Կառավարության հատկացրած 100 մլն դրամը:
Նախարարության աջակցությամբ ապահով վայր են տեղափոխվել ձնաբքի պատճառով խցանման մեջ հայտնված 831 քաղաքացիներ:
ՀՀ ոստիկանության պետի տեղակալ Արա Ֆիդանյանը հաջորդիվ հայտնել է, որ ոստիկանության բարեփոխումների առաջնային ուղղություն էր սահմանվել պարեկային ծառայության ձեւավորումը եւ այն փուլային կարգով ամբողջ հանրապետությունում ներդնելը:
«Մասնավորապես, 2021թ. հուլիսի 7-ին Պարեկային ծառայության եւ Պարեկային ծառայության Երեւան քաղաքի ստորաբաժանման հաջող գործարկումից հետո ծառայության ներդրման շարունակականությունն ապահովելու նպատակով նախատեսում ենք 2022թ. Պարեկային ծառայության ստորաբաժանումներ գործարկել Լոռու եւ Շիրակի մարզերում» ,- ասել է Արա Ֆիդանյանը:
Նա տեղեկացրել է, որ այդ ստորաբաժանումները համալրելու նպատակով Ոստիկանության կրթահամալիրում 2021թ. նոյեմբերի 1-ից հնգամսյա ուսուցում է անցնում 582 թեկնածու:
Արա Ֆիդանյանը ներկայացրել է նաեւ կառույցի իրականացրած մյուս աշխատանքները:
