Օպերատիվ մարտավարական իրավիճակը ներկա դրությամբ հարաբերական լարված է: Այսօր մամուլի ասուլիսի ժամանակ հայտարարեց ՀՀ զինված ուժերի գլխավոր շտաբի պետի տեղակալ Էդվարդ Ասրյանը՝ անդրադառնալով սահմանային ներկա վիճակին:
«Ադրբեջանի ԶՈՒ ստորաբաժանումները փորձում են մի քանի ուղղություններում վարել իրենց սադրիչ հարկադրական գործողությունները, իսկ մեր ԶՈՒ-ն փորձում է նրանց վտարել մեր տարածքից՝ սահմանից այն կողմ: Իրավիճակը լարված է Սեւ լիճ-Վերիշեն հատվածում եւ գիշերվա ընթացքում նաեւ լարվել է Կութ-Նորաբակ ուղղություններում: Գիշերային իրավիճակը հատկապես լարվածության գագաթնակետին է հասել ժամը 05:00-ի դրությամբ, որովհետեւ հակառակորդը փորձում էր իր ուժերը միավորել եւ ստեղծել ավելի նպաստավոր իրադրություն իրենց համար»,- ասաց ԳՇ պետի տեղակալը:
Ըստ նրա՝ գնահատելով այդ իրավիճակը՝ հրամանատարության կողմից որոշում է կայացվել տեղադրել 1 նոր մարտական դիրք:
Նա նշեց, որ նշված գործողության հետևանքով հակառակորդը գերեվարել է մեր 6 զինծառայողի, բայց այնպես չէ, թե միայն այդ 6 զինծառայողն էին գործողություն իրականացնում:
«Կարող է ձեզ մոտ միանգամից հարց առաջանալ՝ ինչու գերեվարել, ինչու մեր զինծառայողները զենք չեն կիրառել: Արդեն իսկ 16 օր է՝ ձեզ հայտնի է, որ ռազմաքաղաքական ղեկավարությունը փորձում է միջադեպը լուծել առանց զենքի կիրառման: Նրանք մոտեցել են մեր զինծառայողներին, զենք են ուղղել եւ հրամայել հանձնվել»,- մանրամասնեց Ասրյանը:
ԳՇ պետի տեղակալն ասաց, որ կապ ունեն Արցախում տեղակայված ռուսական խաղաղապահ ուժերի շտաբի հետ, եւ բանակցային գործընթացը շարունակվում է. «Բոլոր դեպքերում ռազմական ղեկավարությունը, որ բարդ իրավիճակներ չստեղծի, փորձում է բանակցային ճանապարհով լուծել այդ հարցը: Սա է ներկայիս իրավիճակը, որը ես գնահատել եմ»: