ԱԺ-կառավարություն հարցուպատասխանի ընթացքում այսօր «Պատիվ ունեմ» խմբակցության պատգամավոր Տիգրան Աբրահմամյանը հետաքրքրվեց, թե ինչու է արդեն նախկին պաշտպանության նախարար Արշակ Կարապետյանն ազատվել զբաղեցրած պաշտոնից:
ՀՀ վարչապետ Նիկոլ Փաշինյանը նշեց՝ պաշտպանության նախարարի պաշտոնը հայեցողական պաշտոն է և դրանով շատ բան է ասվում:
«Չեմ կարծում, որ նախարարի փոփոխության մանրամասները պետք է հանրայնորեն քննարկել: Կարող եմ ասել, որ հայեցողական բառն ամբողջական պատկերացում է տալիս: Նախարարը նշանակվում է վարչապետի հայեցողությամբ և ազատվում է վարչապետի հայեցողությամբ»:
Հարցին՝ Սուրեն Պապիկյանին այդ պաշտոնում նշանակելու շարժառիթը ո՞րն է, Փաշինյանն ասաց՝ փորձը ցույց է տվել, որ քաղաքական հաղորդակցությունը և քաղաքական բովանդակության ընդհանրությունը շատ կարևոր է. «Ես կարևոր եմ համարում, որ և արտաքին գործերի նախարարի կարգավիճակում, և պաշտպանության նախարարի կարգավիճակում քաղաքական թիմի ներկայացուցիչներ լինեն: ԱԳՆ-ի հայտնի իրադարձություններից հետո ես խորհրդակցություններ էի անում, գնացի ԱԳՆ, շփվեցի վարչության պետերի մեծ մասի հետ, և նրանք միակարծիք ասում էին՝ նշանակեք նախարար քաղաքական թիմից մեկին, ով ձեզ հետ քաղաքական բովանդակությունը կկիսի: Տվյալ դեպքում ՊՆ-ի դեպքում էլ է կարևոր»:
Տիգրան Աբրահամյանի դիտարկմանը, որ տեսանյութերից մեկում, որը երեկ էր տարածվել, երևում է, որ թշնամին գրավում է դիրքը, և կրակոց չի հնչում, հարցին՝ ո՞վ է հրամայել չկրակել, վարչապետն ասաց. «Հնարավոր չէ, որ ՀՀ-ն սահմանների պահպանության վերաբերյալ տա չկրակելու կամ սահմանը չպաշտպանելու հրաման, դա կլինի պետական դավաճանություն»:
Անդրադառնալով երեկվա փոխհրաձգությունից հետո գերի մնացած զինծառայողների փասին, Փաշինյանը նշեց, որ ժամանակն է գերեվարվածության յուրաքանչյուր դեպք պատշաճ ձևով հետաքննել. «ՀՀ ԶՈՒ-ում ծառայություն անցնող յուրաքանչյուր անձ ունի պարտականություններ: Եվ պետք է հստակ բոլոր դեպքերով քննություն լինի: Ի՞նչ է նշանակում գերի ընկնել, ի՞նչ հանգամանքներում: Զինվորական կանոնակարգերը հստակ են սահմանում են, թե որ դեպքում է գերի ընկնելը չի համարվում հանցագործություն: Եվ յուրաքանչյուր դեպքում մենք պետք է քննենք այդ դեպքի հետ գործ ունենք, թե՝ ոչ»,-շեշտեց Փաշինյանը: