Ադրբեջանի պաշտպանության նախարարությունն այսօր հերթական ապատեղակատվությունն է տարածել՝ փորձելով հայկական կողմին մեղադրել սահմանը խախտելու համար՝ նշելով ենթադրյալ միջադեպի վայրը։
«Հունիսի 1-ին Հայաստանի զինված ուժերը՝ բաղկացած մոտ 40 հոգուց, Ադրբեջանի Քելբաջարի շրջանի Արմուդլու գյուղի ուղղությամբ 400 մետր հեռավորության վրա մտել են Ադրբեջանի տարածք և հյուսիսային լայնության 40 աստիճան 4 րոպե 30 վայրկյան, արևելյան երկայնության 45 աստիճան 54 րոպե 42 վայրկյան (N 40 ° 04 '30", E 45 ° 54'42 ") աշխարհագրական կոորդինատներով տեղանքում զբաղեցրել են դիրքեր»,- ասվում է հայտարարության մեջ:
«Օրբելի» վերլուծական կենտրոնի փորձագետ Տարոն Հովհաննիսյանը ֆեյսբուքյան իր էջում լուսանկարներ է հրապարակել՝ ապացուցելով, որ Հայաստանին ուղղված մեղադրանքը կեղծ է։
«Ադրբեջանի պաշտպանության նախարարությունն այսօր փորձել է հայկական կողմին մեղադրել իր սահմանը խախտելու համար՝ նշելով իբր տեղի ունեցած միջադեպի վայրը։ Ընդհանուր պլանի պատկերում կարմիր կետով նշված են Ադրբեջանի ՊՆ կեղծ կոորդինատները։ Իրականում ադրբեջանական դիրքերն այդ ուղղությամբ գտնվում են Հայաստանի Հանրապետության տարածքի խորքում»,- նշել է Հովհաննիսյանը։
Կից ներկայացված են այդ դիրքերի լուսանկարները և դրանց աշխարհագրական տեղորոշումը։
Ադրբեջանի պաշտպանության նախարարությունը հերթական ապատեղեկատվությունն է տարածել, ըստ որի՝ հունիսի 1-ի երեկոյան 40 հայ զինծառայող հատել է Ադրբեջանի սահմանը, ինչից հետո Ադրբեջանի զինված ուժերի ստորաբաժանումները «ստիպել են նրանց վերադառնալ ելման դիրքեր»։
Ակնհայտ է, որ նմանատիպ ապատեղեկատվությունն ադրբեջանական ռազմաքաղաքական ղեկավարությունը շրջանառության մեջ է դնում ՀՀ զինված ուժերի կողմից հայ-ադրբեջանական սահմանային իրադրությունը սրելու փորձերի վերաբերյալ միջազգային հանրության շրջանում տպավորություն ստեղծելու, և Ադրբեջանի ԶՈՒ կողմից մայիսի 12-ին և 13-ին Հայաստանի Հանրապետության տարածք ներթափանցելու սադրանքը հակակշռելու նպատակով։
ՀՀ պաշտպանության նախարարությունը հայտարարում է, որ Հայաստանի Հանրապետության զինված ուժերը ո՛չ հունիսի 1-ին և ո՛չ էլ դրան նախորդող օրերին Ադրբեջանի Հանրապետության սահմանը չեն հատել, և դրա վերաբերյալ բոլոր պնդումներն այդ երկրի պաշտպանական գերատեսչության կողմից տարածվող ապատեղեկատվություն են, որի ծավալը վերջին շրջանում էապես ավելացել է։ Մասնավորապես՝ օրեր առաջ էլ Ադրբեջանի ՊՆ-ն պնդում էր, թե հայկական կողմը կրակ է բացել ինչպես հայ-ադրբեջանական սահմանին, այնպես էլ Շուշիի ուղղությամբ տեղակայված ադրբեջանական դիրքերի վրա, ինչը հերքվեց, համապատասխանաբար՝ Հայաստանի պաշտպանական գերատեսչության և Արցախի Հանրապետությունում խաղաղապահ առաքելություն իրականացնող ՌԴ զորախմբի հրամանատարության կողմից։
