Մարտի 16-ին, առավոտյան ժամը 09:00-ից, ՀՀ զինված ուժերում մեկնարկել են մարտավարական և մարտավարամասնագիտական համատեղ զորավարժություններ: Զորավարժություններին ընդգրկված զորամասերն ու ստորաբաժանումները բերվել են մարտական պատրաստականության համապատասխան աստիճանների, անձնակազմը մեկնել է տեղակայման շրջաններ:
Ծավալվել են զինված ուժերի, զորամիավորումների և ԶՈՒ զորատեսակների կառավարման կետերը, որտեղ իրականացվում են զորավարժությունների մարտական հրաձգության փուլերի և հաշվարկների ճշգրտման, ստորաբաժանումների ու կրակի կառավարման մարզումների նախապատրաստական աշխատանքներ:
Մարտի 16-ին մեկնարկած մարտավարական և մարտավարամասնագիտական համատեղ զորավարժությունների շրջանակում 4-րդ զորամիավորման ենթակա զորամասերից մեկում անցկացվել են մարտական հրաձգությամբ պարապմունքներ՝ «Գումարտակը պաշտպանությունում» և «Գումարտակը հարձակման ժամանակ» թեմաներով։
Պարապմունքների անցկացման նպատակն էր մարտավարական բարդ պայմաններում պաշտպանական և հարձակողական գործողությունների կազմակերպման, ներդաշնակման և հաստիքային միջոցների արդյունավետ կիրառման ուղղությամբ զինծառայողների հմտությունների կատարելագործումը։
Մարտավարական և մարտավարամասնագիտական համատեղ զորավարժությունների շրջանակում մարտի 16-ին 2-րդ զորամիավորման ենթակա զորամասերը բերվել են մարտական պատրաստականության բարձր աստիճանի։
Անձնակազմը հանդերձավորվել է, ռազմական տեխնիկան սահմանված ժամկետներում զբաղեցրել է նախորոշված շրջանները։ Վերադաս հրամանատարության կողմից տրվել են ցուցումներ նախնական խնդիրների կատարման ուղղությամբ։
