«Հայաստանի Հանրապետության տարածքով ոչ մի միջանցք չպետք է տրվի Ադրբեջանին: Եթե խոսքն ապաշրջափակման մասին է, ապա դրա մասին կարող ենք խոսել: Սահմանները բոլոր կողմերից պետք է բացվեն վաղ թե ուշ: Ես դեմ եմ ՀՀ-ի տարածքով որևէ միջանցք տրամադրելուն»:
Այս մասին այսօր խորհրդարանական ճեպազրույցների ժամանակ ասաց ԼՀԿ ղեկավար Էդմոն Մարուքյանը՝ անդրադառնալով Ադրբեջանի նախագահ Իլհամ Ալիևի այն հայտարարությանը, թե Զանգեզուրի միջանցքի գաղափարին Հայաստանն ի սկզբանե դեմ է եղել, սակայն հիմա միջանցքի հարցով կան լավ արդյունքներ:
Դիտարկմանը, որ Բաքվից կա արձագանք եռակողմ հանձնաժողով ստեղծելուն, և հարցին՝ հիմա ժամանա՞կն է այդ հանձնաժողի ստեծման, ԼՀԿ ղեկավարը նշեց.
«Վաղ թե ուշ պետք է լինի նման հանձնաժողով: Այլ բան է, թե ինչ լիազորություններով է այն լինելու օժտված: Արդյոք այդ հանձաժողովի արդյունքները ենթակա են լինելու խորհրդարանի կամ Սահմանադրական դատարանի եզրակացությանն ու վավերացմանը»,-ասաց նա: