5-րդ զորամիավորման ենթակայությամբ գործող N զորամասի հատուկ նշանակության ստորաբաժանման զինծառայողները մայիսի 24-ին անցկացրել են մարտավարական պարապմունքներ։ Դիրքերի արագ փոփոխումով, համակարգված և ներդաշնակ գործողություններով զինծառայողներն իրականացրել են պայմանական հակառակորդի կրակակետերի հայտնաբերման և ոչնչացման վարժանքներ։
Զինծառայողների կրակի վարման հմտությունները կատարելագործելու նպատակով մայիսի 24-ին 3-րդ զորամիավորումում անցկացվել են հրաձգության գործնական պարապմունքներ։ Կատարվել են կրակային տարբեր վարժանքներ, զինծառայողները ցուցաբերել են բարձր պատրաստություն և հաջողությամբ խոցել կրակադաշտի թիրախները։
Զինված ուժերի հակաօդային պաշտպանության զորամասերից մեկի զինծառայողների ներգրավմամբ «Բաղրամյան» զորավարժարանում անցկացվում են ճամբարային հավաքներ։ Հավաքների շրջանակում կազմակերպվող տեսական և գործնական պարապմունքները միտված են զինծառայողների մասնագիտական գիտելիքների զարգացմանը, արագ փոփոխվող իրադրության պայմաններում ճկուն և ներդաշնակ գործողությունների վարման հմտությունների կատարելագործմանը։
