ՀՀ-ում Իրանի դեսպանի հետ քննարկել ենք Գորիս-Կապան միջպետական ճանապարհին ստեղծված իրավիճակը։ Ե՛վ մենք, և՛ իրանական կողմը մտահոգություն ունի ստեղծված իրավիճակի հետ կապված:
Այսօր Կառավարության նիստից հետո լրագրողների հետ զրույցում այս մասին հայտնեց Անվտանգության խորհրդի քարտուղար Արմեն Գրիգորյանը:
«Այս հարցը բոլոր մակարդակներում քննարկում ենք, որպեսզի հնարավորինս արագ լուծում ստանա։ Այսինքն՝ և՛ մեր ռուս գործընկերների, և՛ Ադրբեջանի հետ քննարկումներում այս հարցը բարձրացնում ենք ու ակնկալում, որ հնարավորինս արագ լուծվի»:
Ինչ վերաբերում է ադրբեջանցիների կողմից արցախցի երեխաներով ավտոբուսի կանգնեցմանն առնչվող հարցին, Արմեն Գրիգորյանն ասաց. «Այդ ճանապարհի հետ կապված Ադրբեջանը պարբերաբար պրովոկացիաներ է կատարում: Հայաստանի կողմից դատապարտող հայտարարություններ եղել են: Այդ խնդիրը քննարկվել է ՌԴ մեր գործընկերների, նաև՝ ադրբեջանցիների հետ, որպեսզի նման իրավիճակ այլևս չկրկնվի»,- ասաց ԱԽՔ քարտուղարը: