Էջմիածնում գտնվող զորամասի Արցախյան երկրորդ պատերազմի ընթացքում անհետ կորած զինծառայողներից մեկը երեկ Բաքվից վերադարձել է Հայաստան: Այդ մասին լրագրողների հետ զրույցում ասաց Պաշտպանության նախարարության դիմաց ակցիա իրականացնող անհետ կորած զինծառայողների հարազատներից Անահիտ Ադոյանը:
«Ունենք մեկ տղա, որը վերադարձել է, կփորձենք կապ հաստատել նրա հետ: Շատ ուրախ ենք, որ գոնե մեկը վերադարձել է Հայաստան, բայց պետք է պայքարենք մնացած 40-ի համար: Նա նույն զորամասի ՄՈԲ-ից էր»,- ասաց Ադոյանը:
Դեկտեմբերի 14-ին ռուս խաղաղապահների միջնորդությամբ տեղի է ունեցել գերիների փոխանակման գործընթաց: Ադրբեջանից Հայաստան են տեղափոխվել պաշտոնապես հաստատված 44 հայ գերիներ։
Անհետ կորած զինծառայողների ծնողները և հարազատները դեկտեմբերի 1-ից բողոքի ակցիաներ են անցկացնում: Պաշտպանության նախարարությունը նրանց հայտնել էր, որ ամեն ինչ անում է, որպեսզի հնարավորինս շուտ Զանգելանի հատվածում որոնողական աշխատանքներ իրականացվեն:
