Բելառուսի հակաօդային պաշտպանության համակարգերը բերվել են մարտական պատրաստության։ Այս մասին երեքշաբթի հայտարարել է երկրի նախագահ Ալեքսանդր Լուկաշենկոն երկրի Անվտանգության խորհրդի նիստում։
Նրա խոսքով՝ Բելառուսում «օդային պաշտպանության համակարգերը բերվել են մարտական պատրաստության՝ թույլ չտալու համար ռուսական զորքերին թիկունքից հարվածներ հասցնել»։ «Պաշտպանության նախարարն ինձ զեկուցել է արևմտյան սահմանը ևս հինգ գումարտակով ծածկելու պատրաստակամության մասին»,- ասել է Լուկաշենկոն։
«Այլ կերպ չենք կարող անել, մենք անընդհատ սադրանքների ենք սպասում արևմտյան գործընկերների կողմից, կա՛մ քաղաքականության, կա՛մ տնտեսության, կա՛մ ռազմական ոլորտում»,- ասել է նա։
Լուկաշենկոն հավելել է, որ բելառուս զինվորականները չեն մասնակցում Ուկրաինայում ռազմական գործողություններին և չեն էլ պատրաստվում դա անել ապագայում։
«Բելառուսական բանակը ռազմական գործողություններին չի մասնակցել և չի մասնակցում: Մենք դա կարող ենք ապացուցել ցանկացածին: Ավելին, Ռուսաստանի ղեկավարությունը երբեք մեզ մոտ չի բարձրացրել այս հարցը՝ զինված հակամարտությանը մեր մասնակցության մասին: Մենք չենք պատրաստվում մասնակցել Ուկրաինայում այս հատուկ գործողությանը, նման անհրաժեշտություն չկա»,- ասել է Լուկաշենկոն, որի խոսքերը մեջբերում է բելառուսական Belta գործակալությունը։
Ներկայում Բելառուսի նախագահը հստակեցրել է, որ բելառուսական բանակի ուժերի և միջոցների մի մասը կենտրոնացված է հարավային ուղղությամբ՝ Ուկրաինայի հետ սահմանի մոտ։ «Մենք սեփական ուժերով ծածկում ենք Բրեստից մինչև Մազիր պետական սահմանը՝ կանխելու ֆիզիկական ուժի և զենքի ներթափանցումը երկիր»,- ասել է Լուկաշենկոն։