«Ռուսաստանի և Ուկրաինայի միջև Բելառուսում բանակցությունների հարթակը պատրաստվել է, սպասվում է պատվիրակությունների ժամանումը»,- երկուշաբթի Twitter-ում գրել է ԱԳՆ խոսնակ Անատոլի Գլազը։ Նա հավելել է, որ բելառուսական կողմը պատրաստ է ցանկացած պահի կազմակերպել գործընթացը։
«Բանակցությունները կսկսվեն բոլոր պատվիրակությունների հանդիպման վայր հասնելուն պես»,- ասել է դիվանագետը։
Ավելի վաղ բանակցություններում ռուսական պատվիրակության ղեկավար, նախագահի օգնական Վլադիմիր Մեդինսկին հայտնել էր, որ կիրակի օրը ուկրաինական կողմի հետ պայմանավորվածություն է ձեռք բերվել բանակցություններ վարել Բելառուսի Գոմելի շրջանում։ Ռուսական պատվիրակությունն արդեն Մինսկից մեկնել է հանդիպման վայր։
Կիրակի օրը Բելառուսի նախագահ Ալեքսանդր Լուկաշենկոն ասել է, որ նախկինում փորձել է կապ հաստատել Ուկրաինայի նախագահ Վլադիմիր Զելենսկու հետ՝ համոզելու նրան նստել բանակցությունների սեղանի շուրջ։ Նրա խոսքով՝ Գոմելում, որտեղ ի սկզբանե նախատեսված էր հանդիպումը, հաջողվել է հարթակ պատրաստել բանակցությունների համար, հանդիպել ռուսական պատվիրակության հետ, սպասել Ուկրաինայի պատասխանին։