Մարդու իրավունքների պաշտպան Արման Թաթոյանը կդիմի Սահմանադրական դատարան, եթե Ազգային ժողովն ընդունի կառավարության մշակած օրինագիծը, որով հնարավորություն է ստեղծվում կրճատել ՄԻՊ գրասենյակի տարեկան բյուջեն: Այս մասին Թաթոյանն ասաց այսօր հրավիրված մամուլի ասուլիսի ընթացքում:
«Այս նախագիծը համարում եմ խտրական, որը ուղղված է ՄԻՊ գործունեությունը սահմանափակելուն», -հայտարարեց Թաթոյանը:
«Հայաստանի կառավարությունը նախաձեռնել է նախագիծ, որով նախատեսվում է վերացնել Հայաստանի մարդու իրավունքների պաշտպանի անկախությունը կառավարությունից և ԱԺ-ում կառավարող խմբակցությունից, և այլևս խնդիրներ բարձրացնելու համար քաղաքական իշխանության մարմինները կարող են կրճատել մեր հաստատության ֆինանսավորումը»,- նշեց ՄԻ պաշտպանը։
Ըստ նրա՝ ՄԻՊ տարեկան բյուջեն այս տարի կազմել է 532 մլն 480 դրամ, որից աշխատանքի վարձատրության համար ամբողջ մասը հանած, տարեկան աճը կազմել է 2 մլն 350 հազար դրամ:
Մարդու իրավունքների պաշտպանը հիշեցրեց, որ այս նախագիծն առաջարկվել է դեռ 2020 թվականի սեպտեմբերին, քննարկումները հետաձգվել են պատերազմի պատճառով ու վերսկսվել այս տարի:
«Նախորդ տարի ես կառավարությունում ներկայացրել եմ մեր սկզբունքային առարկությունները, և այդ ժամանակ երկու հիմնարար պատճառ էր ինձ բերվում, առաջինը, որ նման դրույթները խանգարում են միջազգային ներդրումներին, և երկրորդը՝ ֆինանսական բարդությունների առաջացման դեպքում երկրում, բյուջեի մեկ հատվածից մյուսը գումարներ տեղափոխելու դեպքում, ճկունություն չի լինում»,-ասաց Թաթոյանը:
