Արցախի նախագահ Արայիկ Հարությունյանը աշխատանքային օրը սկսել է Արմավիրի մարզում: Նախագահին վաղ առավոտյան Սարդարապատում դիմավորել է մարզպետը:
Այցի նպատակը 44-օրյա պատերազմում մարզի նահատակ հերոսների շիրիմներին այցելելն ու հարգանքի տուրք մատուցելն է: Նախագահը մասնակցել է Ջանֆիդա համայնքում պատերազմի ժամանակ այս գյուղից զոհվածների հիշատակի միջոցառմանը:
Հայրենիքի պաշտպանության ժամանակ զոհվածներից երկուսն արժանացել են պետական բարձր պարգևների, իսկ Ռուստամ Գասպարյանին շնորհվել է Արցախի հերոս բարձրագույն կոչումը: Արմավիրի քաղաքապետն էլ հայտնել է, որ Գասպարյանին հետմահու շնորհվել է նաև «Արմավիրի պատվավոր քաղաքացու» կոչում:
Արմավիրի քաղաքապետ Դավիթ Խուդաթյանը Ֆեյսբուքի իր էջում հայտնել է՝ Արմավիրի ավագանու այսօրվա նիստում Արցախյան գոյամարտում ունեցած բացառիկ ավանդի համար Ռուստամ Ռաֆիկի Գասպարյանին հետմահու շնորհվել է «Արմավիրի պատվավոր քաղաքացի» կոչում: «Փառք Հայրենիքի պաշտպանության խրամատում զոհված բոլոր հերոսներին»,- գրել է Արմավիրի քաղաքապետը:
