Մայիսի 7-ին՝ ժամը 13։50-ի սահմաններում, Ադրբեջանի ԶՈՒ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի արևելյան ուղղությամբ տեղակայված ՀՀ ԶՈՒ մարտական դիրքերի, ինչպես նաև Սոթքի ոսկու հանքավայրի ուղղությամբ, ինչի հետևանքով հրազենային վիրավորում է ստացել հանքավայրի աշխատակիցներից մեկը։ Նրա կյանքին վտանգ չի սպառնում։
Պատասխան գործողություններով ադրբեջանական ստորաբաժանումների կրակը լռեցվել է։
Ժամը 16։30-ի դրությամբ իրադրությունը հայ-ադրբեջանական սահմանին հարաբերականորեն կայուն է։ Այս մասին հաղորդում են ՀՀ պաշտպանության նախարարությունից:
«Արմենպրես»-ի հետ զրույցում «ԳեոՊրոՄայնինգ» ընկերության պաշտոնական ներկայացուցիչ Ռուզաննա Գրիգորյանն ավելի վաղ նշել է, որ կրակոցները սկսվել են դեռ մայիսի 6-ի երեկոյան ժամին, սակայն ավելի ինտենսիվ են դարձել մայիսի 7- ի կեսօրին:
«Վիրավորը հանքավայրի հորատողն է: Նա գտնվում է հոսպիտալում, վիճակը կայուն է: Տղամարդը վիրավորվել է ձախ ձեռքի կողմից` սրտի ուղղությամբ, սակայն, բարեբախտաբար, ներքին օրգանների վնասվածք չունի», - ասել է նա։
Գրիգորյանը նաև նշել է, որ հանքավայրը դադարեցրել է աշխատանքը, տեղի է ունեցել աշխատակիցների տարհանում:
