«Պատմամշակութային արգելոց-թանգարանների և պատմական միջավայրի պահպանության ծառայությունը» սեպտեմբերի 29-ին ժամը 13։00-ին «Լոռի բերդ քաղաքատեղի» պատմամշակութային արգելոցում կազմակերպում է «Բագրատունյաց ժառանգություն» խորագրով միջոցառում՝ նվիրված հայկական թագավորությունների և հատկապես Բագրատունյաց թագավորության ժառանգությանը։
Կցուցադրվեն միջնադարյան հայկական արքունական խոհանոցը, տարազը, երաժշտությունն ու արհեստները։ Այցելուները խոհանոցի բարիքները համտեսելու հնարավորություն կունենան։
Սրան զուգահեռ կկազմակերպվի մարտական դրվագների բեմադրություն, երաժշտական նվագարաններով «երաժշտական մարտեր», «Լոռի բերդ քաղաքատեղի» պատմամշակութային արգելոցից գտածոների ցուցադրություն։ Միջոցառման երաժշտական մասը կապահովեն «Որդան կարմիր» ռոք խումբը, «Վիշապ» համույթը՝ միջնադարյան երաժշտությունների առանձնահատուկ մատուցմամբ:
