Վրաստանում գրանցվել է կորոնավիրուսի նոր տեսակի առաջին դեպքը՝ տեղեկացնում է aliq.ge-ն՝ հղում անելով Վրաստանի Հիվանդությունների վերահսկման և հանրային առողջապահության կենտրոնի հայտարարությանը:
Վարակը հաստատվել է 50-ն անց տղամարդու մոտ, որի վիճակն այս պահին բավարար է: Պացիենտը մեկուսացված է: Հայտնաբերվել են նաև նրա հետ կոնտակտի մեջ եղած անձինք:
Հիվանդությունների վերահսկման և հանրային առողջապահության կենտրոնի փոխտնօրեն Պաատա Իմնաձեի հայտարարությամբ՝ վարակված անձը չի եղել Մեծ Բրիտանիայում, սակայն Իմնաձեն չի կոնկրետացրել, թե որ երկրում է ճանապարհորդել պացիենտը: Նրա խոսքով՝ կորոնավիրուսի նոր տեսակով վարակվածը գործնականում առողջացած է:
Ըստ Իմնաձեի՝ կորոնավիրուսի նոր տեսակը չի տարբերվում հնից ծանրության և մահացության ցուցանիշներով, սակայն ավելի արագ է տարածվում: Նրա խոսքով շատ կարևոր է անվտանգության կանոնների պահպանումը:
Հունվարի 4-ի ժամը 11:00-ի դրությամբ Վրաստանում արձանագրվել է կորոնավիրուսով վարակման 594 նոր դեպք: Ընդհանուր դեպքերի քանակը երկրում 229 763 է:
Վրաստանում վերջին 24 ժամվա ընթացքում կորոնավիրուսից բուժվել է ևս 1963 պացիենտ: Երկրում ընդհանուր հաշվով վարակը հաղթահարել է 222 405 մարդ: Երկրում վարակից մահացել է ևս 25 մարդ, ընդհանուր՝ 2628:
Կորոնավիրուսի տարածման պատկերը ըստ շրջանների՝
- Թբիլիսի՝ 226
- Աջարիա՝ 64
- Իմերեթի՝ 87
- Քվեմո Քարթլի՝ 24
- Շիդա Քարթլի՝ 20
- Գուրիա՝ 32
- Սամեգրելո-Զեմո Սվանեթի՝ 64
- Կախեթի՝ 44
- Մցխեթա Մթիանեթի՝ 20
- Սամցխե-Ջավախեթի՝ 8
- Ռաճա-Լեչխումի և Քվեմո Սվանեթի՝ 5:
