Կորոնավիրուսային հիվանդության դեմ «Սպուտնիկ V» ռուսական պատվաստանյութով պատվաստումը Հայաստանում կսկսվի ապրիլի 19-ից։ Պատվաստանյութն արդեն բաշխված է առաջնային օղակի բժշկական հաստատություններին: Այս մասին «Հայկական Ժամանակին» հայտնեց առողջապահության նախարարության մամուլի խոսնակ Հռիփսիմե Խաչատրյանը։
««Սպուտնիկ V» պատվաստանյութի առաջին 15 հազար չափաբաժինը կստանան բուժաշխատողները, խրոնիկ հիվանդություններ ունեցողները, սոցիալական հաստատությունների աշխատողները, 18-ից մինչեւ 55 տարեկան քաղաքացիները, իսկ 55 տարեկանից բարձր քաղաքացիները հնարավորություն կունենան այդ պատվաստանյութով պատվաստվել, երբ Ռուսաստանից Հայաստան ներկրվի պատվաստանյութի նոր խմբաքանակ»,- ասաց նա:
Հիշեցնենք՝ ապրիլի 13-ից Երևանում, իսկ ապրիլի 14-ից մարզերում սկսվել է կորոնավիրուսային հիվանդության դեմ «AstraZeneca» պատվաստանյութով պատվաստումները: Այժմ առաջին փուլում պատվաստվում են ռիսկային առաջին խմբի 65 տարեկանից բարձր անձինք: