Երկրում տիրող կորոնավիրուսային հիվանդության իրավիճակով պայմանավորված՝ առողջապահության նախարարությունը նոր սահմանափակումներ է մտցնելու կորոնավիրուսի տարածման դեմ պայքարի համատեքստում։ Հարցն արդեն քննարկվում է նախարարությունում:
Տեղեկությունը «Հայկական Ժամանակի» հետ զրույցում հաստատեց առողջապահության նախարարության հասարակայնության հետ կապերի բաժնի պետ Լիլիթ Բաբախանյանը:
Սպասվող սահմանափակումներից մեկը բաց տարածքներում դիմակ դնելու պարտադիր պայմանն է լինելու: Սրանից բացի, նախարարությունը որոշել է սահմանափակել զանգվածային միջոցառումների մասնակիցների թիվը՝ օրինակ՝ հոգեհանգիստներին թույլատրելով մինչև 60 հոգի։
Փոփոխություն է կատարվելու նաև հոկտեմբերի 1-ից ուժի մեջ մտած նոր կարգում, ըստ որի՝ աշխատող քաղաքացիները, որոնք չեն պատվաստվել քովիդի դեմ, պետք է գործատուին ներկայացնեն կա՛մ ՊՇՌ թեստավորման պատասխանը, կա՛մ պատվաստված լինելու տեղեկանքը 14 օրը մեկ: Սակայն նախատեսվում է 14 օրը փոխարինել 7 օրով: Այսինքն՝ աշխատող քաղաքացիները թեստի պատասխանը գործատուին ներկայացնեն յուրաքանչյուր 7 օրը մեկ:
Հիշեցնենք՝ ավելի վաղ վարչապետ Նիկոլ Փաշինյանն էր հայտարարել, որ Հայաստանը լոքդաունի չի անցնի, բայց որոշ սահմանափակումներ կլինեն. «Խստացվելու են դիմակներ դնելու կանոնները, և չի բացառվում, որ մենք գնանք բաց տարածքներում համընդհանուր դիմակներ դնելու կանոններին: Երբ կա դիմակ դնելու համընդհանուր պարտադրանք, ավելի լավ է վերահսկում իրականացնել»,- ասել էր նա: