«Օմիկրոնի» մուտացման աստիճանը մեծ է, վարակը 50 մուտացիա է կրում, որից 30 վերաբերում է սպայկային սպիտակուցին։ Այս մասին հրավիրված մամուլի ասուլիսի ժամանակ հայտարարել Առողջապահության նախարար Անահիտ Ավանեսյանը։
Նախարարը նշում է, որ սահմանափակումներ կկիրառվեն աֆրիկյան երկրներից ժամանող քաղաքացիների համար․ «Հետևելով ԱՀԿ-ի հաղորդագրություններին՝ նախատեսում ենք որոշ սահմանափակող միջոցառումներ կիրառել տվյալ երկրներից եկող քաղաքացիների համար, մինչև օրվա վերջ կունենանք հստակ սահմանափակումների նոր կազմը»:
Նշված երկրների քաղաքացիների մուտքը ՀՀ ժամանակավոր կարգելվի․
- Հարավաֆրիկյան Հանրապետություն,
- Բոթսվանայի Հանրապետություն,
- Լեսոթոյի Թագավորություն,
- Նամիբիայի Հանրապետություն,
- Մոզամբիկի Հանրապետություն,
- Մադագասկար,
- Տանզանիայի Հանրապետություն։
Առողջապահության համաշխարհային կազմակերպությունը (ԱՀԿ) դեռ չունի հաստատված տեղեկություն, որ «օմիկրոն» շտամով վարակվելիս հիվանդությունը զարգանում է ավելի ծանր ձևով, քան կորոնավիրուսի այլ տարբերակների դեպքում։ Այս մասին ասվում է ԱՀԿ-ի կողմից կիրակի օրը հրապարակված հաղորդագրությունում․ «Նախնական տվյալները ցույց են տալիս, որ Հարավային Աֆրիկայում հոսպիտալացման ավելի բարձր մակարդակ կա, բայց դա կորող է պայմանավորված լինել վարակվածների թվի ավելացմամբ, և ոչ թե բուն «օմիկրոնով» վարակվելու հետևանքով»։
ԱՀԿ-ն հայտարարել է նաև, որ այս պահին տեղեկություններ չկան այն մասին, թե «օմիկրոնով» վարակվելու ախտանիշները տարբերվում են այլ շտամներով վարակվելու ախտանիշներից։ Պարզ չէ նաև, թե արդյոք նոր շտամն ավելի վարակիչ է կորոնավիրուսի այլ տարբերակների համեմատ, ներառյալ «դելտայից»: Ինչպես պարզաբանել է կազմակերպությունը, կորոնավիրուսով վարակվածների թիվն աճել է Հարավային Աֆրիկայի այն շրջաններում, որոնք տուժել են «օմիկրոն» շտամից։ Այնուամենայնիվ, այս պահին չկան ուսումնասիրությունների վերջնական արդյունքներ, որոնք հստակ ցույց կտան, որ այս աճը տեղի է ունեցել հենց նոր շտամի պատճառով, և ոչ այլ գործոններով պայմանավորված:
Մտահոգությունները, թե նորանոր շտամները ինչպես են ազդելու պատվաստումների արդյունավետության վրա, մնում են, բայց ինչպես տեսնում ենք, երբ դելտա շտամը նոր էր շրջանառվում, նմանատիպ մտահոգություններ եւս եղել են, ասաց այսօր առողջապահության նախարար Անահիտ Ավանեսյանը լրագրողների հետ ասուլիսի ընթացքում։
Նրա խոսքով՝ դելտա շտամը վարակելիության առումով փոխեց պատկերը, բայց այնուամենայնիվ ծանր, ծայրահեղ ծանր եւ մահվանից պաշտպանության բավականին շեմ ապահովում են պատվաստումները։
«Բոլորս հույս ունենք, որ այս նոր շտամի առումով եւս կպահպանվի պատվաստումների արդյունավետությունը»,- ասաց նախարարը։
Ասուլիսի շրջանակներում նա ասաց, որ վարակը շարունակում է մուտացվել, այդ պատճառով որոշ երկրների քաղաքացիների մուտքը կարգելվի։
