«Moderna» դեղագործական ընկերությունը հավանաբար շատ շուտով կստանա կորոնավիրուսի դեմ իր ստեղծած պատվաստանյութն արտադրելու ու տարածելու արտոնագիր, քանի որ ԱՄՆ-ի սննդամթերքի եւ դեղերի վարչության անդամներն այս պատվաստանյութի մեջ լուրջ մտահոգող փաստեր չեն հայտնաբերել: Այս մասին տեղեկացնում է «Ամերիկայի ձայն»-ը: Ըստ վարչության փորձագետների՝ երկու չափաբաժիններով տրամադրվող պատվաստանյութը մեծ արդյունավետություն է գրանցել Covid 19-ի տարածումը կանխելու հարցում և 18-ից բարձր տարիք ունեցող անձանց մոտ չի գրանցել վտանգավոր կողմնային ազդեցություններ: Այսպիսի մեկնաբանություններ են տեղ գտել այն փաստաթղթերում, որոնք դրված են քննարկման: Քննարկումներ, որոնց արդյունքից է մեծապես կախված «Moderna»-ի պատվաստանյութի արտոնագրի ճակատագիրը:
«Moderna»-ն արտոնագիր ստանալուց հետո կդառնա ԱՄՆ-ում իր պատվաստանյութն արտադրելու իրավունք ստացած երկրորդ ընկերությունը «Pfizer» և գերմանական «BioNTech» համատեղ ընկերություններից հետո: «Pfizer»-ի պատվաստանյութի ներարկումները սկսվել են երկուշաբթի օրվանից, և հույս կա, որ նաև «Moderna»-ի պատվաստանյութի միջոցով շուտով կիրականացվեն այս ամսվա ընթացքում ԱՄՆ-ում 20 միլիոն անձանց պատվաստելու խոստումները:
