Կառավարության նիստում վարչապետ Նիկոլ Փաշինյանի խնդրանքով Առողջապահության նախարար Արսեն Թորոսյանը ներկայացրեց կորոնավիրուսի հետ կապված իրավիճակը: Նախարարը նշեց, որ դեկտեմբերի 23-ին եղել է կորոնավիրուսի 702 նոր դեպք:
«Մոտ երկու շաբաթ է՝ որևէ պացիենտ չունենք, որ տանը հոսպիտալացման է սպասում: Ավելին, սկսել ենք որոշ հիվանդանոցներ վերադարձնել իրենց բնականոն գործունեությանը, իհարկե, միշտ պատրաստ լինելով նորից կորոնավիրուսով զբաղվելու: Այդ տրամաբանությամբ հետևում ենք զարգացումներին, կոչ ենք անում հակահամաճարակային կանոնները պահպանել»,-ասաց Թորոսյանը՝ ավելացնելով, որ այժմ մարդիկ ավելի քիչ են օդափոխում սենյակները, և ռիսկը մեծ է, հավելյալ ջանքեր պետք է գործադրել:
Նիկոլ Փաշինյանն ընդգծեց, որ մեր երկիրը կորոնավիրուսի երկրորդ ալիքին շատ ավելի լավ էր պատրաստված: «Առաջին ալիքի ժամանակ շատ էին հնչում քննադատություններ, որոնց մի մեծ մասը քաղաքականացված էր: Մեզ ի ցույց էին դնում տարբեր օրինակներ, թե տեսեք՝ որքան վատ են կառավարվում կորոնավիրուսի դեպքերը Հայաստանում, բայց մեր կանխատեսումն իրականություն դարձավ, որ երկրները, ըստ էության, լինելու են նույն իրավիճակում, և դա ընդամենը ժամանակի ու ժամանակացույցի հարց է: Կային երկրներ, որ երբ մենք պիկի վրա էինք, ըստ էության, զրոյական վիճակ էր իրենց մոտ: Հիմա այնտեղ թվերի մի մասով մեզնից անցել են, մյուս մասով կանցնեն անխուսափելիորեն», - նկատեց վարչապետը:
Արսեն Թորոսյաննն իր հերթին նշեց, որ մահացության թիվը Հայաստանում շատ ցածր է, տատանվում է 1,5 տոկոսի շրջանակում, մինչդեռ շատ զարգացած երկրներում այդ թիվը տատանվել է 7-8, մինչև 10 տոկոսի շրջանակում: «Մահացության թիվը Հայաստանում միշտ ցածր է եղել միջազգային միջինից: Ամենավատ ժամանակներում դա չի անցել 2 տոկոսից, իսկ հիմա ավելի ցածր է: Շատ կարևոր է, թե մենք ինչքան փրկված հիվանդ ենք ունեցել: Այդ առումով մենք շատ լավ դիրքերում ենք»,- ասաց նախարարը:
Կառավարության նիստին վարչապետ Նիկոլ Փաշինյանը նշեց, որ ամենահրատապ խնդիրը շարունակում է մնալ գերեվարվածների վերադարձի և անհետ կորածների գտնվելու վայրը և ճակատագիրը պարզելու գործընթացը:
«Կառավարությունը ամենօրյա ռեժիմով աշխատում է այդ ուղղությամբ, ուղղակի այստեղ կան հարցեր, որոնք անհամատեղելի են հրապարակայնության հետ: Այսինքն՝ որքան շատ հրապարակային լինի, այդքան ավելի կդժվարանա ու վնաս կտա գործին: Մենք ունենք ցավալի գործընթաց, որի մասին հրապարակային խոսելը ոչ թե վնասակար է, այլ ուղղակի շատ ծանր է: Բայց հարկ եմ համարում խոսել այդ մասին: Մենք ունենք մարմինների նույնականացման գործընթաց՝ ԴՆԹ թեստերով: Գործընթացն արագացնելու համար առողջապահության նախարարությունը ձեռք է բերել համապատասխան սարքավորման երկրորդ հոսքագիծը, որն արդեն ճանապարհին է: Սպասում ենք, որ առաջիկա օրերին կհասնի Հայաստան և կսկսի գործարկվել»,- ասաց վարչապետը:
Առողջապահության նախարար Թորոսյանն էլ նշեց, որ դա թույլ կտա կրկնապատկել ունեցած հզորությունը: Այս ամենին զուգահեռ՝ թողունակության մեծացման այլ գործընթացներ էլ են արվում:
«Դա պարզ գործընթաց չէ, շատ բարդ ու բազմակոմպոնենտային գործընթաց է, դրանով է պայմանավորված թվացյալ դանդաղությունը: Թվերով մենք շատ մեծ ծավալ ենք իրականացրել, մեր օրական մինչպատերազմյան թվերից մոտավորապես 10 անգամ ավելի հետազոտություններ են արվում»,- նշեց Թորոսյանը:
Վարչապետը հիշեցրեց, որ, ցավոք սրտի, նույնականացման սխալներ նույնպես տեղի են ունեցել, որոնք, ըստ Թորոսյանի՝ շտապելու, ոչ ԴՆԹ թեստի միջոցով նույնականացնելու հետևանք են:
«Եղել է վիզուալ նույնականացում, որից հետո ԴՆԹ-ն, այնուամենայնիվ, կատարելուց հետո պարզվել է, որ այդ վիզուալ նույնականացումն այդքան էլ ճիշտ չէր, դրանով է պայմանավորված եղել սխալը, ոչ թե բուն ԴՆԹ թեստի սխալով: Որովհետև եթե 100 տոկոսանոց համընկնում չենք ունենում, չենք ասում, որ նույնականացված է»,- հավելեց նախարարը:
Հայաստանի կառավարության ամենահրատապ հարցը շարունակում է մնալ գերիների և անհետ կորածների գտնվելու վայրը և ճակատագիրը պարզելը: Այդ մասին կառավարության նիստում նշեց վարչապետ Նիկոլ Փաշինյանը՝ ավելացնելով, որ գործադիրն ամենօրյա ռեժիմով աշխատում է այդ ուղղությամբ, բայց կան հարցեր, որոնք անհամատեղելի են հրապարակայնության հետ, որքան շատ հրապարակային լինի, վնաս կլինի գործընթացին:
«Այդ գործընթացն արագացնելու համար համապատասխան սարքավորման երկրորդ հոսքագիծն է ձեռք բերվել, և սարքավորումն արդեն ճանապարհին է: Ցավոք, մի քանի դեպք է եղել, երբ պարզվել է նույնականացումն այդքան էլ ճշգրիտ չի իրականացվել, բայց լինում են այդպիսի դեպքեր, այնպես չէ, որ մենք բարձր որակով չենք անում», - ասաց վարչապետը:
Առողջապահության նախարար Արսեն Թորոսյանն էլ տեղեկացրեց, որ դա ավելի շատ շտապելու հետևանք է, ոչ թե ԴՆԹ-ով նույնականացնելու:
