ՀՀ առողջապահության նախարարության կողմից մշակված բոլոր ընթացակարգերը, որոնք վերաբերում են կորոնավիրուսային հիվանդությանը, ուժի մեջ են բոլոր շտամերի պարագայում: Այս մասին ասուլիսում նշեց ՀՀ ԱՆ hիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանն՝ անդրադառնալով այն դիտարկմանը, որ օմիկրոն շտամի պարագայում հիվանդությունը, սովորաբար թեթև ընթացք է ունենում:
«Այո, միջազգային կազմակերպությունները նշում են, որ այն երկրներում, որտեղ կա օմիկրոն շտամ, դեռևս հիվանդությունը թեթև ընթացք է ունենում: Իհարկե, դա, կորոնավիրուսային հիվանդության ընթացակարգերի հետ կապված, ոչինչ չի փոխում: Կապ չունի դելտա կամ օմիկրոն շտամ է, միևնույն է կորոնավիրուսի հետ կապված նախարարության կողմից մշակված բոլոր ընթացակարգերը ուժի մեջ են»,-ասաց Ռոմելլա Աբովյանն՝ ավելացնելով, որ կորոնավիրուսի և սուր շնչառական վարակների ախտանշանները բավական նման են, չի առանձնացվում նաև օմիկրոն շտամը: Օմիկրոնի դեպքում ևս լինում է ջերմության բարձրացում, քթից արտահոսք:
Հայաստանում կորոնավիրուսիային իրավիճակը համեմատաբար հանդարտվել է: Վարակի վերարտադրողական ցուցանիշը 1-ից ցածր է ու կազմում է 0.9: «Արմենպրես»-ի հետ զրույցում ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը նշեց, որ վարակի վերարտադրողական վերջին 14 օրվա ցուցանիշը, դրան նախորդած 14 օրվա հետ համեմատ, 54 տոկոսով նվազել է:
«Դրական թեստերի մասնաբաժինը 1.3 տոկոս է: Հիվանդանոցային ծանրաբեռնվածությունը հիմա համեմատաբար թեթև է: Լավ լուրն այն է, որ Հայաստանն այս պահին, ըստ ԵՄ չափանիշների, կանաչ գոտում է»,-ասաց Ռոմելլա Աբովյանը:
Ռոմելլա Աբովյանը նշեց, որ պատվաստումների ընթացքը բավական ակտիվ է: Նա նկատեց, որ այն երկրներում, որտեղ պատրաստվածության բարձր մակարդակ կա, կորոնավիրուսի օմիկրոնի շտամի դեպքում բավական թեթև ընթացք է լինում:
