ՀՀ վարչապետ Նիկոլ Փաշինյանն այսօր Կառավարության նիստի ժամանակ անդրադարձավ այն պնդումներին, թե պետությունը հավելյալ բեռ է դնում քաղաքացիների վրա, երբ չպատվաստվելու դեպքում ստիպում է ամսվա մեջ 2 անգամ իրենց ֆինանսների հաշվին կորոնավիրուսի թեստ հանձնել.
«Չի կարող լինել որևէ խոսք քաղաքացիների վրա հավելյալ ծախս սահմանելու մասին: Կառավարությունը հոգում է, որ մեր սիրելի հայրենակիցները բացարձակապես անվճար ստանան պատվաստում: Քաղաքացին ինքն է ընտրում՝ ծա՞խս անել, թե՞ ոչ: 300 հազար պատվաստվողներից մենք չունենք որևէ հիշատակման արժանի բարդություն: Ինչո՞ւ եմ ասում հիշատակման արժանի, որովհետև, այո, կարող է մարդու ջերմությունը բարձրանալ, ինչպես բոլոր պատվաստումների դեպքում»:
Փաշինյանը շեշտեց՝ Կառավարության ներկայացուիչները առաջիններից են եղել, որոնք պատվաստվել են. «Դահլիճում նստած մարդիկ, եթե չունեն հակացուցում, բոլորը պատվաստված են: Ես ինքս պատվաստված եմ, մեր բոլորի ընտանիքի անդամները պատվաստված են: Եթե մենք զգանք, որ կարիք կա կրկին պատվաստվելու, մենք դա պետք է անպայման անենք: Սա մի պրոցես է, որով պետք է անցնենք: Մեր երկրի պատվաստման ցուցանիշերը ցածր են: Դա իր բացատրությունն ունի, կապված է տարվա սկզբում երկրում առաջացած քաղաքական իրավիճակի հետ և դրանից բխող իրավիճակների հետ: Բայց հիմա մենք պետք է այդ բացը լրացնենք»,- շեշտեց վարչապետը: