Առողջապահության համաշխարհային կազմակերպությունը հայտնում է, որ «COVID-19»-ի մուտացիայի ենթարկված տեսակը հայտնաբերվել է Եվրոպայի 22 երկրում: ՏԱՍՍ գործակալությունը տեղեկացնում է, որ այս մասին հայտարարություն է արել Առողջապահության համաշխարհային կազմակերպության Եվրոպայի տարածաշրջանային բյուրոյի տնօրեն Հանս Կլյուգեն Կոպենհագենում կայացած բրիֆինգի ընթացքում:
«Ինչպես բոլոր վիրուսները, COVID-19-ը նույնպես ժամանակի ընթացքում փոխվել է: Ես հասկանում եմ անհանգստությունը SARS CoV-2 (VOC) տարբերակի հնարավոր ազդեցության հետ կապված: Եվրոպայի 22 երկրում այդ նոր տարբերակը հայտնաբերվել է»,-նշել է նա: Կլյուգեն պարզաբանել է, որ այս նոր տարբերակը տարածվում է ավելի արագ, թեպետ հիվանդությունը, որ նա առաջացնում է, էական փոփոխությունների չի ենթարկվել: SARS CoV-2 (VOC) տարբերակը գրանցվել է բոլոր տարիքային խմբերի շրջանում:
ԱՀԿ-ն տեղեկացնում է, որ 2021 թվականի սկզբին Եվրոպայի տարածաշրջանի տարբեր երկրներում ավելի քան 230 մլն մարդ ապրում է ամբողջական մեկուսացման պայմաններում, որոշ երկրներում մտադիր են հայտարարել նոր սահմանափակումների մասին:
Հայաստանում հունվարի 7-ի ժամը 11:00-ի դրությամբ հաստատվել է կորոնավիրուսային հիվանդության ընդհանուր 161 հազար 54 դեպք, որոնցից 147 հազար 388-ն` առողջացած, 2901-ը` մահվան ելքով: Հիվանդությունների վերահսկման և կանխարգելման ազգային կենտրոնը հայտնում է, որ կորոնավիրուսային հիվանդությամբ այս պահին փաստացի բուժում է ստանում 10 070 պացիենտ: Ընդհանուր առմամբ, կատարվել է 602 հազար 986 թեստավորում:
Հունվարի 6-ին կատարվել է 1218 թեստավորում, որից հաստատվել է կորոնավիրուսային հիվանդության 201 նոր դեպք: Առկա է 812 առողջացած և 11 մահվան դեպք: Նախորդ օրն արձանագրվել է մահվան 3 դեպք, երբ պացիենտներն ունեցել են կորոնավիրուսային վարակ, սակայն մահը վրա է հասել այլ հիվանդության պատճառով։ Այդպիսի դեպքերի ընդհանուր թիվը 695 է: