Ցավով պիտի նշեմ, որ բավական երկարատեւ ընդմիջումից հետո մենք նոր տիպի կորոնավիրուսի մեկօրյա նոր դեպքերի էական աճ ունենք: Այս մասին Կառավարության այսօրվա նիստում հայտարարեց վարչապետ Նիկոլ Փաշինյանը:
Վարչապետը նշեց, որ 700-ից ավելի ախտորոշված դեպք կա 1 օրվա. նա խնդրեց առողջապահության նախարար Անահիտ Ավանեսյանին մանրամասն ներկայացնել:
Ավանեսյանն ասաց, որ երեկ իրականացվել է 4285 թեստավորում, որից դրական է եղել 748-ը. «Ինչպես եւ կանխատեսել էինք անցած շաբաթ, մենք ունենք հիվանդացության աճ: Այս պահին մեր ակտիվ դեպքերի թիվը 6772 է, որոնցից 901-ը՝ հոսպիտալացված: Մենք այս պահին ունենք 9 բժշկական կենտրոն, որոնք սպասարկում են կորոնավիրուսով հիվանդներին»:
Նախարարն ասաց, որ ներկայումս ազատ մոտ 100 մահճակալ ունեն: Այս օրերին եւս շարունակում են ծավալման աշխատանքները՝ հընթացս տեսնելով աճի տեմպը. «Բայց ուզում եմ զգուշացնել, որ մահճակալների թիվն անսպառ չէ, եւ պետք է ամեն ինչ անել, որ մեր հիվանդների թիվն ավելին չլինի այն կարողություններից, որոնք մենք ունենք, չունենանք էլի պացիենտներ, ովքեր հիվանդ կլինեն, տանը կմնան ու հնարավորություն չեն ունենա հոսպիտալացվելու»:
Նիկոլ Փաշինյանն ասաց, որ այդ խնդիրը լուծելու տարբերակն այն է, որ բոլորը հակահամաճարակային կանոնները մաքսիմալ պահեն, եւ պետք է իրենց խնդիրը լինի, որ շարժվեն այն ճանապարհով, որ լրացուցիչ սահմանափակումներ սահմանելու անհրաժեշտություն չլինի. «Ես խնդրում եմ մեր հանրությանը, ժողովրդին առանձնահատուկ ուշադրություն դարձնել խնդրին, որովհետեւ մեզնից յուրաքանչյուրի անհատական մոտեցումն էական նշանակություն է ունենալու այս հարցում: Ինչ վերաբերում է առողջապահական հզորությունների ծավալմանը, մենք նախկինից արդեն, ըստ էության, գործող պլան ունենք եւ այդ պլանով կառաջնորդվենք: Խնդիրն այն է, որ եկեք ամեն ինչ անենք, որ այդ նախկին առավելագույն ծավալման անհրաժեշտությունը չլինի, ու դա կախված է մեզնից»:
