Տանկային միավորումներից մեկը, որի հրամանատարը գեներալներից մեկի որդին էր, պատերազմի ժամանակ իր անելիքը չի արել, որի պատճառով տապալվել է հակառակորդի ճեղքումը կանգնեցնող օպերացիան։ Այդ մասին Ազգային ժողովում հայտարարեց վարչապետ Նիկոլ Փաշինյանը:
Արձագանքելով պատգամավոր Հովիկ Աղազարյանի հարցին՝ Փաշինյանն ասաց, որ պատերազմի ընթացքում հակառակորդը հարավային ուղղությամբ ճեղքում է կատարել՝ հասնելով մինչև Ջաբրայիլ և ուղղություն վերցնելով դեպի Հադրութ։ Արցախյան հերոսամարտի ամենաակտիվ և նշանակալի դեմքերից մեկը, ըստ վարչապետի, առաջարկել է, որ ճեղքման հատվածը պետք է հյուսիսից կտրել և հակառակորդի ուժերը բաժանել միմյանցից։
«Առաջարկը քննարկելու նպատակով ՊԲ հրամանատարական կետում՝ Ստեփանակերտոմ հրավիրել եմ խորհրդակցություն, որին ՀՀ ԳՇ պետը միացել է սելեկտորով: Քննարկման արդյունքում ԳՇ պետն ասել է, որ հետաքրքիր գաղափար է, բայց պետք է տեղում գնահատել իրադրությունը և տեսնել, թե որքանով է դա իրականանալի։ Գնահատումը պետք է կատարեր ՊԲ հրամանատարությունը։ ՊԲ հրամանատարությունը գնահատել եւ զեկուցել է ԳՇ պետին, որ կարելի է իրականացնել նման գործողություն։ ԳՇ պետն էլ ինձ է զեկուցել, որ իրականանալի է»,- ասաց Փաշինյանը՝ եւ շարունակեց. «Որից հետո օպերացիան սկսվել և մի քանի ժամ հաջող իրագործվել է, ամեն դեպքում՝ ինձ այդպես են զեկուցել, և չի իրագործվել այն պատճառով, քանի որ տանկային միավորումներից մեկն իր անելիքը չի արել և նախատեսված ձևով չի մասնակցել օպերացիային։ Հիմա թե ինչո՞ւ դա տեղի չի ունեցել, չգիտեմ, դա քննության առարկա պետք է լինի։ Բայց նպատակը եղել է ճեղքի հատվածը փակելը: Պատկերացրեք, եթե այդ օպերացիան ստացվեր, մենք կունենայինք այլ իրադրություն հետագա պատերազմի համար»:
Վարչապետը վստահեցրեց՝ երբ որ անցնեն այս խառը ժամանակները, այդ ամենը կհետաքննեն, կհասկանան: «Կարող է էն 17-ն (նկատի ունի 17 ուժերին-խմբ.) իրեն է զանգել, ասել՝ քո թշնամին ըտեղ չի, Երևանում է, էդ օպերացիան թարգեք, եկեք էստեղ: ...Կարո՞ղ է նորահայատ ընդդիմադիր գործիչն ինքն է զանգել որդուն։ Իրեն էլ զանգել է իր քաղաքական հայրը, ասել՝ ձեր հակառակորդն այնտեղ չէ, տանկերը պտտեք, պտտեք դեպի Երեւան: Կպարզենք»,- ասաց նա։
Թե ում նկատի ունի վարչապետը՝ տանկային միավորումներից մեկի ղեկավար ասելով՝ չմանրամասնեց: Ըստ մամուլի հրապարակումների՝ խոսքը Սեյրան Օհանյանի որդու՝ Արթուր Օհանյանի մասին է: