Նոյեմբերի 22-ին Ռուսաստանում Հայ Առաքելական Եկեղեցու Ռուսաստանի եւ Նոր Նախիջեւանի թեմի եկեղեցիներում պատարագներ կմատուցվեն Լեռնային Ղարաբաղում ռազմական գործողությունների ընթացքում զոհված զինվորների հիշատակին: Այս մասին շաբաթ օրը ՏԱՍՍ-ին հայտնել են թեմի մամուլի ծառայությունում:
«Այո, կլինեն (զինվորների հիշատակի արարողություններ Ռուսաստանի եկեղեցիներում)»,- ասել են մամուլի ծառայությունում:
Ըստ թեմական կայքի` Ռուսաստանում կա 36 հայկական եկեղեցի: Մոսկվայում են գտնվում Տիրոջ Պայծառակերպության տաճարը, Սուրբ Հարություն եւ Սուրբ Խաչ եկեղեցիները, ինչպես նաեւ` Սուրբ Գեորգի մատուռը: Թեմի մի քանի եկեղեցի գտնվում է նաեւ Ղազախստանում, Մոլդովայում, Լատվիայում, Լիտվայում, Էստոնիայում, Ուզբեկստանում եւ բուն Հայաստանում:
Նոյեմբերի 13-ին, ըստ թեմի կայքում տեղադրված տեղեկատվության, Ամենայն Հայոց Կաթողիկոս Գարեգին Բ-ն եւ ՀՀ Նախագահ Արմեն Սարգսյանը կոչ էին արել նոյեմբերի 22-ը Լեռնային Ղարաբաղում պատերազմում զոհված զինվորների հիշատակի օր հռչակել եւ պատարագներ մատուցել աշխարհի բոլոր հայկական եկեղեցիներում: