Հայաստանի վարչապետի պաշտոնակատար Նիկոլ Փաշինյանի և Ռուսաստանի նախագահ Վլադիմիր Պուտինի հանդիպումը Մոսկվայում կլինի «ժամերի ստուգում»՝ երկկողմ հարաբերությունների զարգացման և խորացման նպատակով: Այս մասին լրագրողների հետ զրույցում ասաց Հայաստանում Ռուսաստանի Դաշնության դեսպան Սերգեյ Կոպիրկինը՝ անդրադառնալով հուլիսի 7-ին Մոսկվայում Հայաստանի և Ռուսաստանի ղեկավարների հանդիպման օրակարգին:
«Առաջնորդները կքննարկեն այն, ինչ անհրաժեշտ կհամարեն: Բնականաբար, կքննարկվեն անվտանգության ոլորտին վերաբերող հարցերը՝ հաշվի առնելով ներկայիս իրավիճակը, կարծիքներ կփոխանակվեն մեր քաղաքական երկխոսության դինամիկան պահպանելու վերաբերյալ, կքննարկվեն հարաբերությունները տնտեսական ոլորտում, հումանիտար ոլորտում: Մի խոսքով՝ կլինի «ժամերի ստուգում»՝ երկկողմ հարաբերությունների հետագա զարգացման և խորացման նպատակով՝ հաշվի առնելով այն իրավիճակը, որը ձևավորվել է Հայաստանում արտահերթ խորհրդարանական ընտրություններից հետո», - մեկնաբանեց Ռուսաստանի դեսպանը:
Այս համատեքստում Կոպիրկինը ավելացրեց, որ կա մեկ այլ կարևոր հարց, որը կարող է քննարկվել Պուտին-Փաշինյան հանդիպման ընթացքում: Հաջորդ տարի Հայաստանը և Ռուսաստանը նշելու են երկկողմ դիվանագիտական հարաբերությունների հաստատման 30-ամյակը, ինչպես նաև՝ Հայաստանի Հանրապետության և Ռուսաստանի Դաշնության միջև Բարեկամության, համագործակցության և փոխադարձ օգնության մասին պայմանագրի ստորագրման 25-ամյակը:
«Կարծում եմ՝ այս հարցի վերաբերյալ նույնպես առաջնորդները կփոխանակվեն մտքերով՝ ինչպես արժանապատվորեն և մեր հարաբերությունների մակարդակին համապատասխանող ոգով նշել այս նշանավոր տարեդարձերը», - ավելացրեց դեսպանը:
Ռուսաստանի նախագահ Վլադիմիր Պուտինը և ՀՀ վարչապետի պաշտոնակատար Նիկոլ Փաշինյանը չորեքշաբթի կայանալիք հանդիպմանը կքննարկեն Լեռնային Ղարաբաղի շուրջ իրավիճակը, բայց փաստաթղթերի ստորագրում չի նախատեսվում: Այդ մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, տեղեկացնում է ТАСС-ը:
Պեսկովը պատասխանել է նաև հայկական մամուլում շրջանառվող լուրերին, որոնց համաձայն` հանդիպմանը երկու երկրի ղեկավարները իբր կարող են քննարկել Հայաստանի սահմանին ռուս խաղաղապահներ տեղակայելու տարբերակները և կստորագրեն համապատասխան փաստաթուղթ:
«Անշուշտ կքննարկվեն Ղարաբաղի, ռուս զինվորականների տեղակայման և, ընդհանրապես, երկկողմ հարաբերությունների հարցերը, բայց որևէ փաստաթղթի ստորագրում չի նախատեսվում»,- շեշտել է մամուլի քարտուղարը:
«Աշխատանքային այցով Մոսկվայում գտնվող Հայաստանի վարչապետի պաշտոնակատար Նիկոլ Փաշինյանի հետ հանդիպումը նախատեսված է օրվա երկրորդ կեսին։ Նախագահն ու վարչապետը հանդիպումը շարունակելու են աշխատանքային ճաշի շուրջ»,-ասել է Պեսկովը։
Վարչապետի պաշտոնակատար Նիկոլ Փաշինյանը հուլիսի 7-ին աշխատանքային այցով մեկնել է Ռուսաստանի Դաշնություն: Ըստ պաշտոնական հաղորդագրության՝ Մոսկվայում տեղի կունենա Նիկոլ Փաշինյանի և Ռուսաստանի Դաշնության նախագահ Վլադիմիր Պուտինի հանդիպումը: Փաշինյանն ու Պուտինը կքննարկեն հայ-ռուսական ռազմավարական օրակարգին վերաբերող հարցեր: Կողմերը քննարկելու են նաև 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների կատարման ընթացքին, ռազմական գործողություններից տուժած Լեռնային Ղարաբաղի բնակչությանը հումանիտար աջակցություն ցուցաբերելուն, տարածաշրջանում տնտեսական և տրանսպորտային կապերի վերականգնմանը վերաբերող հարցեր։
