ՀՀ կառավարությունը նախատեսում է փոփոխություններ իրականացնել պատերազմի ընթացքում ոչ ծանր վիրավորում ստացած անձանց 500 հազար դրամ ֆինանսական աջակցություն տրամադրելու ծրագրում: Այս մասին Ազգային ժողովում կառավարության հետ հարցուպատասխանի ընթացքում ասաց Աշխատանքի և սոցիալական հարցերի նախարար Մեսրոպ Առաքելյանը, պատասխանելով «Իմ քայլը» խմբակցության անդամ Սոս Ավետիսյանի հարցին:
«Ոչ ծանր վիրավորում ստացած անձանց կառավարության կողմից 500 հազար դրամ ֆինանսական աջակցություն տրամադրելու ծրագրում կարող է առաջանալ խնդիր, հաշվի առնելով այն, որ այդ անձանց մի հատվածը ստացել է թեթև վիրավում և բժշկական հաստատություններում կարող է պատշաճ ձևակերպված չլինել: Կառավարության վաղվա նիստի օրակարգում ներառված է հարց, որ այդ ծրագրի շրջանակներում որոշակի փաստաթղթերի փոփոխություն կկատարվի և ժամկետն էլ կերկարաձգվի»,- ասաց Առաքելյանը:
Նախարարը նշեց, որ այս պահի դրությամբ նշված ծրագրից օգտվել է 6000-ից ավելի քաղաքացի:
