.jpg)
Հրադադարի ռեժիմը պահպանվում է Ղարաբաղում շփման գծի ողջ երկայնքով: Այս մասին ճեպազրույցում հայտարարել է ՌԴ ՊՆ խոսնակ գեներալ-մայոր Իգոր Կոնաշենկովը:
«Հրադադարը պահպանվում է շփման գծի ողջ երկայնքով»,- ասել է Կոնաշենկովը:
Ռուսաստանի Պաշտպանության նախարարության պաշտոնական ներկայացուցիչը հայտնել է նաեւ, որ Ղարաբաղում ռուս խաղաղապահների օգնությամբ սկսվել է զոհվածների դիերի փոխանակումը: Դա տեղի է ունենում Շուշի բնակավայրի տարածքում, նշել է նա:
Ռուսաստանի ռազմական ոստիկանությունը շաբաթ օրը` նոյեմբերի 14-ին, սկսում է պարեկության իրականացումը Լեռնային Ղարաբաղում, հայտարարել է ՌԴ ՊՆ պաշտոնական ներկայացուցիչ Իգոր Կոնաշենկովը: Պարեկությունը կիրականացվի «Հյուսիս» եւ «Հարավ» պատասխանատվության գոտիներում։
Նոյեմբերի 11-ին ՌԴ ՊՆ հրապարակած քարտեզների համաձայն` Ղարաբաղում ռուս խաղաղապահները կտեղակայվեն «Հյուսիս» եւ «Հարավ» պատասխանատվության գոտիներում: Առաջինը, մասնավորապես, ներառում է Ստեփանակերտ, Աղդամ եւ Լաչին բնակավայրերին հարող տարածքները, երկրորդը` Տերտերի եւ Աղդամի շրջանների հյուսիսային հատվածները, Մարդակերտ բնակավայրը:
Ռուս խաղաղապահները 12 դիտակետ են տեղակայել Լեռնային Ղարաբաղում, իրավիճակը վերահսկվում է շուրջօրյա:
