Արցախի Հանրապետության միջազգային ճանաչումն այլընտրանք չունի, և Արցախի դեմ ադրբեջանա-թուրքական զինված ագրեսիայով և դրա հետևանքներով պայմանավորված տարածաշրջանային և աշխարհաքաղաքական նոր իրողություններին և մարտահրավերներին արդյունավետորեն դիմակայելու համար դա արտաքին քաղաքական առաջնահերթություն է:
Այս մասին այսօր՝ հունիսի 30-ին, Ազգային ժողովի նիստում հայտարարել է ԱՀ նախագահ Արայիկ Հարությունյանը՝ պատգամավորներին ներկայացնելով ԱՀ նախագահի 2020 թվականի գործունեության միջոցառումների ծրագրի ընթացքի, արդյունքների և 2021 թվականի գործունեության միջոցառումների ծրագրի վերաբերյալ հաղորդում։
Անդրադառնալով 2020 թվականի պատերազմի ընթացքում Արցախի Հանրապետության արտաքին գործերի նախարարության գործունեությանը՝ նախագահը մասնավորապես նշել է, որ գերատեսչությունն իր ներկայացուցչությունների և Սփյուռքի կառույցների աջակցությամբ քաղաքական և տեղեկատվական արշավ էր ծավալել՝ ուղղված Արցախի ճանաչման գաղափարի առաջմղմանը:
«Ավելի քան 100 երկրների խորհրդարանների ղեկավարներին են ուղարկվել նամակներ Արցախի անկախությունը ճանաչելու կոչով՝ ագրեսիային վերջ տալու նպատակով: Արցախի պաշտոնական տեսակետը և պատերազմի հետևանքների վերաբերյալ զեկույցներ ներկայացվել են տարբեր միջազգային ատյաններում, այդ թվում՝ ՄԱԿ-ում, ԵԱՀԿ-ում, Եվրոպայի խորհրդում: Որքանով եղավ այդ աշխատանքը արդյունավետ և ինչքանով կնպաստի արտաքին քաղաքական բնագավառում մեր հետագա անելիքներին, սա այլ հարց է: Մենք այսօր նոր մարտահրավերներ ունենք՝ կապված Ադրբեջանի և Թուրքիայի ավելի ագրեսիվ արտաքին քաղաքականության հետ, այնպես որ 2020 թվականին ձեռնարկված քայլերը գնահատելու, վերլուծելու, մեր հին ու նոր բարեկամների հետ աշխատանքն ակտիվացնելու կարիք ունենք, որի ուղղությամբ քայլեր կատարում ենք», - ասաց Արայիկ Հարությունյանը:
Հանրապետության նախագահի խոսքով՝ 2020 թ. նոյեմբերի 10-ին ռազմական գործողությունների դադարեցումից հետո հիմնական ջանքերն ուղղվել են Ադրբեջանում պահվող ռազմագերիների և այլ անձանց վերադարձի, ինչպես նաև Ադրբեջանի կողմից Արցախի օկուպացված տարածքներում հայկական մշակութային ժառանգության պաշտպանությանն ուղղված խնդիրների լուծմանը։
«Բազմաթիվ նամակներ են հղվել ՄԱԿ-ի գլխավոր քարտուղարին, Մարդու իրավունքների գերագույն հանձնակատարին, ՅՈՒՆԵՍԿՕ-ի գլխավոր տնօրենին, ինչպես նաև Եվրոպայի խորհրդի գլխավոր քարտուղարին և ԵԽ մարդու իրավունքների գերագույն հանձնակատարին, սերտ համագործակցություն կա Արցախում Կարմիր խաչի միջազգային կոմիտեի առաքելության հետ», - ընդգծել է նախագահը:
Արայիկ Հարությունյանը նշել է, որ 2020-2021 թվականներին ԱՀ ԱԳՆ կողմից շարունակվել են աշխատանքները միջազգային իրավական դաշտին ինտեգրվելու, մասնավորապես՝ միջազգային կոնվենցիաներին միանալու նպատակով:
«Հաստատման ընթացքում են «Միջազգային պայմանագրերի իրավունքի մասին 1969 թ. Վիեննայի կոնվենցիան», «Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի և պատժի տեսակների դեմ կոնվենցիան», «Պետությունների իրավունքների և պարտականությունների մասին Մոնտեվիդեոյի Կոնվենցիան»», - հաղորդման մեջ ասել է երկրի ղեկավարը։
Նախագահը հստակ ընդգծել է, որ բացի Արցախի կարգավիճակի միջազգային ճանաչումից, արտաքին քաղաքական գերատեսչության անելիքների օրակարգը ներառում է Արցախի Հանրապետության տարածքային ամբողջականության վերականգնումը և բռնի տեղահանված ԱՀ քաղաքացիների վերադարձի ապահովումը իրենց բնակավայրեր, ԱՀ բնակչության կենսագործունեության համար կայուն անվտանգ միջավայրի ապահովումը, Ռուսաստանի Դաշնության հետ կապերի խորացումը և ամրապնդումը, ԱՀ շահերի պաշտպանությունը ազդեցիկ միջազգային կառույցներում, Ադրբեջանում պահվող ռազմագերիների ու պատանդների վերադարձին, անհետ կորած անձանց ճակատագրերի պարզմանը, բռնազավթված տարածքներում հայկական հոգևոր ու նյութական ժառանգության պաշտպանությանը նպաստում և Հայաստան-Արցախ-Սփյուռք եռամիասնության ամրապնդումը՝ ուղղված համահայկական օրակարգային խնդիրների արդյունավետ լուծմանը:
