Ռուսական խաղաղապահ առաքելության անդամները շարունակում են ապահովել Հայաստանից արցախցիների անվտանգ վերադարձը Լեռնային Ղարաբաղ: Այս մասին հայտնում է ՌԴ Պաշտպանության նախարարության պաշտոնական կայքը` նշելով, որ վերջին մեկ օրում ապահովվել է 540 արցախցու վերադարձը:
«Այսօր ավտոբուսներով Երևանից Ստեփանակերտ ապահովվել է 540 փախստականի վերադարձը: Ավտոբուսների շարժը ուղեկցվել է ռուսական խաղաղապահ առաքելության կոնտինգենտի և ռազմական ոստիկանության կողմից: Ընդհանուր առմամբ Լեռնային Ղարաբաղ է վերադարձել մոտ 44,6 հազար փախստական»,- ասված է հաղորդագրությունում: Ռուսական խաղաղապահ առաքելությունը շարունակում է 23 դիտորդական կետերից շուրջօրյա ռեժիմով հետևել հրադադարի պահպանմանը:
Արցախի Մարտունի քաղաքում առայսօր ցուցակագրվել է վնասված 850 տուն պատերազմի ընթացքում հակառակորդի հրետակոծությունների հետևանքով. քաղաքում ընդհանուր առմամբ կա 950 տուն:
«Արմենպրես»-ի հետ զրույցում այս մասին տեղեկացրեց Մարտունու քաղաքային համայնքի ղեկավար Էդիկ Ավանեսյանը՝ հավելելով, որ վնասված շենք-շինությունների ուսումնասիրման գործընթացը շարունակվում է: Նրա հաղորդմամբ՝ հրետակոծության հետևանքով վնասվել են նաև՝ 10 վարչական նշանակության, 9 բազմաբնակարան, 2 դպրոցական, 2 մանկապարտեզի շենք-շինություն, ինչպես նաև՝ շրջկենտրոնի մշակույթի պալատն ու ենթակառուցվածքները:
«Վերականգնման աշխատանքները նախատեսված են փուլերով: Ըստ առաջնահերթության՝ այս փուլում նախատեսվում է վերականգնել 68 տուն: Ընդհանուր առմամբ, արդեն իսկ ցուցակագրված է 180 տուն, որոնք առաջնահերթության կարգով պետք է վերականգնվեն: Շինարարական աշխատանքներում ընդգրկված են 10 շինարարական ընկերություն ու կազմակերպություն՝ Հայաստանից ու Արցախից »,-մանրամասնել է քաղաքապետը:
Մարտական գործողությունների Մատաղիսի, Թալիշի, Հադրութի ուղղությամբ իրականացված որոնողական աշխատանքների ընթացքում զոհված զինծառայողների աճյուններ չեն հայտնաբերվել:
Այս մասին
«Արմենպրես»-ի հետ զրույցում տեղեկացրեց Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը: «Այսօր որոնումներ են իրականացվում Ֆիզուլու, Հադրութի և Զանգելանի ուղղություններում»-հայտնեց Թադևոսյանը:
Սեպտեմբերի 27-ին Ադրբեջանի սանձազերծած պատերազմի ավարտից հետո մեկնարկած որոնողափրկարարական աշխատանքների արդյունքում առայսօր հայտնաբերվել է 1073 զոհված զինծառայողների ու քաղաքացիական անձանց աճյուններ,ինչպես նաև մարտական գործողությունների վայրերից ողջ են գտնվել 7 զինծառայող և 2 քաղաքացիական անձ:
