Երևանի նորընտիր քաղաքապետ Հրաչյա Սարգսյանը չի պատրաստվում անդամակցել «Քաղաքացիական պայմանագիր» կուսակցությանը:
«Այդպիսի քննարկումներ չունենք: Ես անկուսակցական եմ և ստանձնել եմ քաղաքապետի պարտականությունները, որպեսզի կառավարեմ այն ծրագրերը, որ սկսել եմ, միևնույն ժամանակ ապահովեմ այն խզվածությունը, որ առկա էր գործադիր, օրենսդիր մարմինների ու ավագանու միջև»,- լրագրողների հետ ճեպազրույցում ասաց նա:
Սարգսյանը տեղեկացրեց, որ քաղաքապետի առաջին տեղակալի պաշտոնին առաջարկելու է «Իմ քայլը» խմբակցության քարտուղար Լևոն Հովհաննիսյանին: Նա նշեց նաև, որ Երևանի քաղաքապետարանում ու վարչական շրջաններում սպասվում են կադրային փոփոխություններ:
Երևանի նորընտիր քաղաքապետ Հրաչյա Սարգսյանը խոստանում է շարունակել այն բարեփոխումները, որոնք արդեն իսկ սկսվել են քաղաքի կառավարման գործում: Այդ մասին նա ասաց լրագրողների հետ ճեպազրույցի ընթացքում:
«Մենք սկսել ենք տրանսպորտի բարեփոխումները: Իմ համար սա կարևոր է, քանի որ ես անձամբ եմ ղեկավարել տրանսպորտի բարեփոխման ծրագիրը: Խոսքը միայն ավտոբուսների ձեռքբերման մասին չէ, այլ երթևեկության ճիշտ կազմակերպման, նոր պարկերի, նոր ճանապարհների կառուցման մասին է: Մենք արդեն ունենք նախագծեր, որոնց հիմնարկեքը կարծում եմ 2022 թվականին կտանք»,- նշեց Սարգսյանը:
Նա հայտնեց, որ հաջորդ տարի ձեռք են բերելու 100 հատ 12 մետրանոց ավտոբուսներ: «Մրցույթն արդեն ընթացքի մեջ է»,- ասաց Սարգսյանը՝ նշելով, որ ավելի ուշ մանրամասն կներկայացնի տրանսպորտի բարեփոխումների շուրջ իրենց անելիքները: