«Քաղաքացիական պայմանագիր» կուսակցության վարչությունը վերջնական որոշում դեռ չունի՝ դաշինքո՞վ, թե՞ առանձին է մասնակցելու արտահերթ խորհրդարանական ընտրություններին: Այդ մասին ԱԺ-ում լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը:
Նա նշեց, որ ընտրական ցուցակին անդրադառնալու են մայիսին, դեռևս վերջնական որոշում չկա թե՛ ցուցակի հերթականության և թե՛ հետագա պաշտոնների հետ կապված:
Մակունցը հայտնեց, որ առաջիկայում՝ մինչև ամսվա վերջ, կլինի վարչապետի հրաժարականը, կոնկրետ օր չկարողացավ նշել:
«Իմ քայլը» խմբակցության ղեկավարն ասաց, որ իշխանության եռամյա աշխատանքի ընթացքում, իհարկե, եղել են բացթողումներ, և ամեն ինչ չէ, որ հասցրել են անել:
Մակունցն ասաց, որ 2018-ից հետո Հայաստանի ամենամեծ նվաճումը ժողովրդավարական բարեփոխումներն են, որոնց ուղղությամբ հետևողականորեն գնում են երկիրը և ազատ քաղաքացին:
Ինչ վերաբերում է գերիների վերադարձին, Մակունցը նշեց, որ համապատասխան գերատեսչությունների կողմից ամեն ինչ արվում է խնդիրը լուծելու համար:
«Եթե ոմանք մեկնաբանում են այն (խմբ. - Սյունիքում բողոքի ակցիաները) որպես քաղաքական ակցիա, ես կարծում եմ՝ դրանք ակցիաներ էին՝ ուղեկցված խուլիգանական դրսևորումներով: Սա է իմ մեկնաբանությունը Սյունիքում կատարվածի վերաբերյալ», - ԱԺ-ում լրագրողների հետ զրույցում ասաց ՀՀ ԱԺ «Իմ քայլը» խմբակցության ղեկավար Լիլիթ Մակունցը:
Հարցին՝ արդյոք այդ մարդկանց թվում չկայի՞ն դժգոհ քաղաքացիներ, Մակունցը նշեց, որ «դժգոհելու առիթ միշտ կա և դժգոհելու առիթ լինելու է բոլոր իշխանությունների պարագայում, սակայն այստեղ հարցն այլ է»:
«Կա որոշակի միտում՝ Հայաստանի Հանրապետությունը բաժանելու մասերի, և դա նկատվում է, այո՛, առանձին խմբակների կողմից, որը, իհարկե, չի կարող ընդունելի լինել որևէ երկրի ղեկավարության և իրավապահ համակարգի կողմից»,- հավելեց Մակունցը:
Լրագրողների հարցին՝ ովքե՞ր են երկիրը միտումնավոր փորձում մասերի բաժանել՝ պատասխանեց՝ չի կարող անուններ հնչեցնել, որովհետև չգիտի, բայց հետևելով իրադարձություններին և տեսնելով ծավալվող գործողությունները, տպավորություն ունի, որ դրանք ուղղորդված են:
«Մենք մեր գործողություններով երբեք չենք փորձել և միտում չենք ունեցել տարանջատելու հասարակությանը, և դա է պատճառը, որ 2018 թ. մայիսից եղել են հայտարարություններ և գործողություններ, որոնք միտված են եղել հնարավորություն տալու դաշտում բոլորին թե՛ ինքնադրսևորվելու, թե՛ տալու հնարավորություն իրենց պաշտոնական և մասնագիտական գործունեությունում ունենալու ՀՀ շահերին սպասարկող վարքագիծ»,- ասաց Մակունցը:
Նրա խոսքով՝ ՀՀ իշխանությունների գործողությունները վերջին ամիսներին որևէ կերպ չեն մղել քաղաքացիներին, քաղաքական ու հասարակական խմբերին ձեռնարկելու նման գործողություններ:
