Առանձին քաղաքական գործիչների կողմից ՀԱՊԿ-ի նկատմամբ հնչող չհիմնավորված քննադատությունը ոչ մի օգուտ չի բերում և չի նպաստում փոխընդունելի որոշումների որոնմանը։ Այս մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
Նրա խոսքով՝ նման ապակառուցողական հայտարարություններն անիմաստ են:
«Այսօր Երևանում ՀԱՊԿ գլխավոր քարտուղար Ստանիսլավ Զասը ՀՀ վարչապետ Նիկոլ Փաշինյանին կներկայացնի ՀԱՊԿ-ի առաքելության աշխատանքի արդյունքների վերաբերյալ գնահատականներն ու առաջարկները: Դրանից առաջ՝ սեպտեմբերի 27-ին, Զասը նախնական զեկույցը ներկայացրել է ՀԱՊԿ-ի Մշտական խորհրդի նիստին»,- ասել է դիվանագետը:
Նա հիշեցրել է, որ ՀԱՊԿ գլխավոր քարտուղարը և ՀԱՊԿ-ի պատվիրակության ղեկավար Անատոլի Սիդորովը այցելել են հայ-ադրբեջանական սահման, գնահատել են տեղում իրավիճակը:
Ինչ վերաբերում է Ղազախստանում ՀԱՊԿ-ի համատեղ զորավարժություններին մասնակցելուց Երևանի հրաժարվելուն, ապա ըստ Զախարովայի՝ Հայաստանը գործում է՝ ելնելով երկրի Զինված ուժերի առաջնային խնդիրներից՝ հաշվի առնելով ներկա իրավիճակը:
«ՀԱՊԿ-ի շրջանակում Հայաստանի հետ փոխգործակցությունն ընդհանուր առմամբ արդյունավետ է: Հայաստանի նախագահությունը համընկավ կազմակերպության անվտանգության համար սպառնալիքների և մարտահրավերների ժամանակահատվածի հետ, որոնց մենք պետք է համատեղ դիմակայենք: ՀԱՊԿ գագաթնաժողովը նախատեսվում է անցկացնել Երևանում. այն կամրագրի 20 տարում կառույցի գործունեության արդյունքները, կուրվագծվեն ապագայի հեռանկարները»,- հավելել է Զախարովան:
Մոսկվան հանդես է գալիս եռակողմ հայտարարությունների անվերապահ կյանքի կոչման օգտին. այն ներառում է տեսություն և պրակտիկա, տեղի ունեցածի մատնանշում և ապագայի ծրագիր: Դրանք իրական, այլ ոչ թե թվացյալ ճանապարհային քարտեզ են:
Այս մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ անդրադառնալով Հայաստան-Ադրբեջան սահմանին միջազգային դիտորդական առաքելության տեղակայման հետ կապված՝ պաշտոնական Երևանի հայտարարության վերաբերյալ հարցին:
Նա նշել է, որ կողմերի միջև ձեռք բերված պայմանավորվածությունները չեն մնացել թղթի վրա և քայլ առ քայլ կյանքի են կոչվել: «Այն, ինչ իրապես գործում է, չի կարելի փոխարինել թվացյալով»,- ասել է դիվանագետը:
Ոչ տարածաշրջանային որոշ դերակատարներ փորձում են անկայունություն բերել Հարավային Կովկաս, որը նոր է ստացել ճգնաժամից դուրս գալու հնարավորություն: Նրանք փորձում են խոչընդոտել ձեռք բերված պայմանավորվածությունների կյանքի կոչմանը և Ուկրաինայում ստեղծված անկայունությունը տեղափոխել հետխորհրդային տարածքի այլ հատվածներ, ինչն ապակառուցողական մոտեցում է:
Այս մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ անդրադառնալով Հայաստանի ու Ադրբեջանի միջև լարվածության պայմաններում ԱՄՆ-ի և Ֆրանսիայի հայտնած դիրքորոշումներին:
«Ռուսաստանը շարունակում է ակտիվ ջանքեր գործադրել հայ-ադրբեջանական սահմանին իրավիճակի ապաէսլակացման ուղղությամբ: Համապատասխան քայլեր են ձեռնարկվում նաև ՀԱՊԿ-ի գծով: Անհրաժեշտ է ապահովել կրակի դադարեցման կայուն ռեժիմ և բոլոր ուժերի հետքաշում նախկին դիրքեր»,- ասել է դիվանագետը: