ՄԱԿ-ի Կրթության, գիտության եւ մշակույթի կազմակերպությունը (ՅՈՒՆԵՍԿՕ) քննարկում է Լեռնային Ղարաբաղում մշակութային հուշարձանների վերականգնման գործընթացում մասնակցության հարցը: Այս մասին ՏԱՍՍ-ին հայտնել է ՅՈՒՆԵՍԿՕ-ում Ռուսաստանի մշտական ներկայացուցիչ, դեսպան Ալեքսանդր Կուզնեցովը՝ պատասխանելով ՌԴ ԱԳՆ ղեկավար Սերգեյ Լավրովի հայտարարությանն այդ միջազգային կառույցի արձագանքի մասին հարցին:
«ՅՈՒՆԵՍԿՕ-ի քարտուղարության ղեկավարությունը, բնականաբար, տեղյակ է մեր նախարարի հայտարարության մասին: Հարցը քննարկվում է»,-ասել է Կուզնեցովը՝ այլ մանրամասներ չներկայացնելով:
Ավելի վաղ ռուսական եւ արտասահմանյան ԶԼՄ-ներին տված հարցազրույցում ՌԴ ԱԳՆ ղեկավար Սերգեյ Լավրովը նշել էր Լեռնային Ղարաբաղում մշակութային հուշարձանների վերականգնման գործընթացում ՅՈՒՆԵՍԿՕ-ի ներգրավման անհրաժեշտությունը: «Մենք, իհարկե, կներգրավվենք ՅՈՒՆԵՍԿՕ-ին, որպեսզի մշակութային ժառանգության հուշարձանները վերականգնվեն եւ ապահովվի դրանց նկատմամբ հարգալից վերաբերմունքը: Մենք նաեւ կներգրավվենք Կարմիր խաչի միջազգային կոմիտեին, ՄԱԿ-ի փախստականների հարցերով գերագույն հանձնակատարի գրասենյակին, որպեսզի մարդիկ կարողանան վերադառնալ իրենց օջախներ, կառուցեն այդ օջախներն ու ապրեն նորմալ կյանքով»,-ասել էր նախարարը:
