Ի աջակցություն ՀՀ վարչապետի եւ Կառավարության Հանրապետության հրապարակում կամավորներ էին հավաքվել: Վարչապետը դուրս եկավ նրանց մոտ եւ կոչ արեց դադարեցնել հանրահավաքը:
«Երեկվանից, բոլոր հնարավոր ձեւերով իրազեկում ենք, որ այս հանրահավաքը տեղի չունենա: Ես գիտեմ, որ ՀՀ-ում ձեզ նման տասնյակ հազարավոր մարդիկ կան ովքեր ըստ անհրաժեշտության կգան հրապարակ: Խոնարհվում եմ տղերքի առաջ ովքեր առաջնագծից են, խոնարհվում եմ ձեր առաջ, ձեր հերոսության առաջ, խոնարհվում եմ մեր բոլոր զոհերի առաջ, խոնարհվում եմ ծնողների առաջ: Ես հիմա նաեւ չեմ մնալու էստեղ, որ հավաքը շարունակվելու պատճառ չդառնամ»,- նշեց վարչապետը, շնորհակալություն հայտնելով աջակցության համար:
Նիկոլ Փաշինյանը հավաքը դադարեցնելու կոչ արեց եւ խոստացավ, որ ժողովրդին չի դավաճանի: Նաեւ խոստացավ, որ անհրաժեշտության դեպքում բոլորին կհրավիրի հրապարակ:
«Խնդրում եմ՝մի քիչ կանգնեք զրուցեք և հավաքը դադարեցրեք: Ես ձեզ խոստանում եմ, ես ժողովրդին չեմ դավաճանի, ես ձեզ խոստանում եմ, երբ կլինի անհրաժեշտություն ես ձեզ բոլորիդ կհրավիրեմ հրապարակ, բայց խնդրում եմ հավաքը դադարեցրեք»,- ասաց նա և հեռացավ:
Հիշեցնենք, որ այսօր հայտարարություն էր տարածել վարչապետի աշխատակազմի ղեկավար Էդուարդ Աղաջանյանը, ով նշել էր, որ նման հանրահավաք է կազմակերպվելու և նաև ասել էր, թե իրենք դեմ են դրան:
