Պատգամավոր Արթուր Հովհաննիսյանի հարցը՝ ուղղված ՀՀ վարչապետին, վերաբերում էր բանակի զարգացման հարցում միջոցների հայթայթմանը, եւ այդ առումով հանրության կարծիքին, թե պետք էր տարիների ընթացքում որոշ օլիգարխների կուտակած հարստությունը օգտագործել:
«Էսօր շատ մարդիկ կան՝ նախկին բարձրաստիճան պաշտոնյաներ, ովքեր լալահառաչ ճառեր են ասում Արցախի մասին, Հայաստանի մասին: Բայց այդ մարդիկ եղել են պետական պաշտոնյաներ, ունեն միլիոնավոր դոլարների ունեցվածք եւ դա հանրահայտ փաստ է: Ես կարծում եմ, որ այդ մարդիկ ոչ Հայաստանի, ոչ էլ Արցախի մասին լալահառաչ ելույթ ունենալու իրավունք չունեն, որովհետեւ այդ նրանց կողմից գողացված միջոցներն են, որ չեն դարձել ինստիտուտ: Մեր երկրում համատարած ինստիտուտների պրոբլեմ կա: էսօր որ խոսում ենք մեր դիվանագիտական կարողությունների մասին եւ ընդհանրապես մնացած կարողությունների մասին, դրանք ինչի՞ արդյունքում պետք է ստեղծվեին, պետք է ստեղծվեին ներդրումների արդյունքում, որոնք տասնյակ տարիներով չեն կատարվել»,- արձագանքեց վարչապետը:
Մյուս կողմից, ըստ նրա, հեղափոխական իշխանության խոստումն ու պարտավորությունն է եղել, որ վենդետաներ չեն լինելու: «Եվ մենք ստեղծել ենք օրենսդրական որոշակի մեխանիզմներ, որոնք հնարավորություն կտան հանրությունից գողացված միջոցները վերադարձնել, եւ էսօր այդ մեխանիզմները սկսում են գործել, որպեսզի այդ միջոցները վերադարձվեն եւ ներդրվեն հանրային կյանքի կազմակերպման ոլորտում: Սա է մեր տեսլականը»,- նկատեց Փաշինյանը՝ հավելելով, որ հանրային պահանջը կա եւ պետք է այնպես անել, որ դա չվերածվի վենդետաների:
