2021թ հունվարի 5-ին տեղի է ունեցել աշխատանքային այցով Արցախի Հանրապետությունում գտնվող Հայաստանի Հանրապետության Արտաքին գործերի նախարար Արա Այվազյանի և Արցախի Հանրապետության Ազգային ժողովի նախագահ Արթուր Թովմասյանի անդրանիկ հանդիպումը: Այս մասին հայտնեցին Արցախի Հանրապետության Ազհային ժողովի հասարակայնության հետ կապերի և հաղորդակցության բաժնից ։
Այնուհետև հանդիպումը շարունակվել է ԱՀ ԱԳ նորանշանակ նախարար Դավիթ Բաբայանի, ՀՀ ԱԳՆ ներկայացուցիչների, ԱՀ ԱԺ փոխնախագահի, խմբակցությունների ղեկավարների և մշտական հանձնաժողովների նախագահների ներկայությամբ:
ԱՀ ԱԺ նախագահը ողջունելով և շնորհավորելով ՀՀ և ԱՀ ԱԳ նորանշանակ նախարարներին ՝ առաջին հերթին հույս է հայտնել, որ Արցախի ժողովուրդն ու խորհրդարանի անդամները մշտապես Հայաստանի Հանրապետության ժողովրդի կողքին են և խորհրդարանական դիվանագիտության խողովակներով պայքարելու են Արցախի անկախության համար, ինչպես նաև պատրաստ են վավերացնելու ոչ միայն տարածաշրջանի,այլև տարբեր երկրների հետ փոխշահավետ համագործակցության համաձայնագրեր:
ՀՀ ԱԳ նախարար Արա Այվազյանը շնորհակալություն է հայտնել ջերմ ընդունելության համար և վստահեցրել, որ ՀՀ և ԱՀ դիվանագիտությունները սկիզբ են առել Արցախի հակամարտությունից, որի ընթացքում ունեցել են և հաջողություններ ,և անհաջողություններ: ՀՀ ԱԳ նախարար Արա Այվազյանը շեշտել է, որ շարունակվելու են Արցախի ինքնորոշման և հակամարտության ուղղությամբ տարվող աշխատանքները: Կարևորել է նաև խորհրդարանական դիվանագիտությունը ՝որպես արդյունավետ գործելու միջազգային առանցքային հարթակ :
Հաջորդիվ հանդիպումն ուղեկցվել է ԱԺ նախագահի ,ԱԺ փոխնախագահի, խմբակցությունների մշտական հանձնաժողովների կողմից ՀՀ ԱԳ նախարարին ուղղված հարցադրումներով :
Հանդիպման ավարտին ԱԺ նախագահ Արթուր Թովմասյանը ողջունել է նման ձևաչափով հանդիպումները և հույս հայտնել ,որ դրանք կլինեն շարունակական։
Ավելի վաղ Արցախի Հանրապետության նախագահ Արայիկ Հարությունյանը հունվարի 5-ին ընդունել է ՀՀ արտաքին գործերի նախարար Արա Այվազյանին: Այս մասին հայտնեցին ՀՀ նախագահի աշխատակազմի տեղեկատվության գլխավոր վարչությունից։
Քննարկվել են ստեղծված իրավիճակին, ադրբեջանա-ղարաբաղյան հակամարտության կարգավորման գործընթացի հեռանկարներին վերաբերող հարցեր: Երկուստեք ընդգծվել է Արցախի ժողովրդի անվտանգության ապահովման և ինքնորոշման իրավունքի անվերապահ ճանաչման ուղղությամբ հայկական երկու պետությունների արտաքին քաղաքական ներուժի առավելագույն իրացման անհրաժեշտությունը:
Հանդիպման ընթացքում անդրադարձ է կատարվել նաև Արցախի դեմ սանձազերծված պատերազմի հետևանքով անհայտ կորած անձանց ճակատագրերի բացահայտման, ռազմագերիների և պատանդների ազատ արձակման խնդիրներին: Այս ուղղությամբ ևս կարևորվել է ԱՀ և ՀՀ գործընկեր գերատեսչությունների համագործակցության շարունակականության ապահովումը:
Հանդիպմանը մասնակցում էին ԱՀ նախագահի աշխատակազմի ղեկավար Արտակ Բեգլարյանը և ԱՀ արտաքին գործերի նախարար Դավիթ Բաբայանը: