«Իմ աղջիկը լավ չէ, տիկին Զոհրաբյան, ես էլ լավ չեմ, իմ ընտանիքն էլ լավ չէ, իմ շրջապատում չկա որեւէ մեկը, որ լավ լինի, որովհետեւ սա պարտություն է, որից պետք է կարողանանք նվազագույն կորուստներով դուրս գալ»,- արձագանքելով ԲՀԿ խմբակցության պատգամավոր Նաիրա Զոհրաբյանի հրապարակային հարցին՝ «Ինչպե՞ս է ձեր աղջիկ Շուշին»՝ այս մասին հայտարարեց «Իմ քայլը» խմբակցության անդամ Համազասպ Դանիելյանը:
Նա ընդդիմադիր պատգամավորներին կոչ արեց գոնե հիմա դրսեւորել հասունություն եւ անկեղծություն: Ասաց՝ կարող է շատ երկար խոսել, թե ով իրեն ինչպես է դրսեւորել պատերազմի ընթացքում, բայց դա հետո:
Նաեւ ընդգծեց՝ հեշտ է հաղթած բանակի մասին հոգ տանել, բայց մենք պետք է կանգնենք մեր բանակի կողքին նաեւ այսօր եւ միաժամանակ կամք ունենանք խոսել առանձին բացթողումների մասին:
«Պետք չէ խաղալ մարդկանց էմոցիաների վրա, պետք չէ մարդկանց դժբախտությունը օգտագործել, պետք չէ այրիացած կնոջը բերել եւ իր ջղայնությունը օգտագործել»,- հորդորեց պատգամավորը եւ շարունակեց.
«Ձեզ թվում է՝ պատերազմի հնարավորություն չկա՞, չե՞ք տեսնում, թե դրսում ինչ հեղհեղուկ է իրավիճակը եւ այդ առիթը պատրաստ եք օգտագործել հանուն ինչի՞»:
