Ընդհանուր առմամբ, միտումների մասին նրանք տեղյակ են եղել: Այս մասին առցանց ասուլիսի ընթացքում հայտարարեց ՀՀ վարչապետ Նիկոլ Փաշինյանը՝ անդրադառնալով հարցին, որ եթե ԱԺ պատգամավորները, նախարարները, Կառավարության անդամները, ՀՀ նախագահը տեղյակ չեն եղել հայտնի հայտարարության բուն քննարկումից և ընդունված որոշումից, արդյո՞ք չի նշանակում, որ այդ ինստիտուտները պարզապես չեն գործում և ճգնաժամի մեջ են:
Նա նշեց, որ պատերազմի ընթացքում ԱԽ երկու նիստ են ունեցել, որին մասնակցել են ՀՀ նախագահը, նիստերից մեկին՝ Վեհափառ Հայրապետը, նաև՝ խոհրդարանական խմբակցությունների ներկայացուցիչներ, եղել են հանդիպումներ քաղաքական ուժերի հետ:
«Այո, կոնկրետության հետ կապված շատ նրբություններ են եղել, որոնք հնարավոր չի համարվել քննարկել, որովհետև, եկել է մի իրավիճակ, որ պետք էր որոշում կայացնել ժամերի ընթացքում, և այդ որոշումները կայացվել են սահմանափակ ժամանակահատվածում՝ խորհրդակցելով ԶՈւ ԳՇ-ի և Արցախի քաղաքական ղեկավարության հետ»,-ասաց նա:
Հարցին էլ՝ արդյո՞ք չի կարծում, որ օր առաջ պետք է արտահերթ ընտրությունների միջոցով ձևավորել նշված ինստիտուտների գործունակ իրավահաջորդներին, Փաշինյանը պատասխանեց, թե ինստիտուտները գործում են և կգործեն:
«Հիմա ես շատ կարևոր եմ համարում, որ մենք ՀՀ-ում կայունությունը և հանրային անվտանգությունը լիովին երաշխավորենք, և այսօր պետք է կենտրոնանաք այդ խնդրի վրա. և՛ խորհրդարանը, և՛ ՀՀ նախագահը, և՛ մնացած բոլոր ինստիտուտները այսօր պետք է գործեն, և մեր բոլորի գործունեությունը պետք է կոնկրետ ուղղված լինի անվտանգությունը և կայունությունը ապահովելուն: Իմ համոզմամբ՝ այդ ինստիտուտները գործունակ են և ունեն գործելու մանդատ և լիազորություն»,-ասաց Նիկոլ Փաշինյանը: