ԱԺ-ում ճեպազրույցների ընթացքում լրագրողներից մեկը ԲՀԿ-ական պատգամավորներից հետաքրքրվեց՝ հնարավո՞ր է՝ ՌԴ արտաքին հետախուզության ծառայության ղեկավար Սերգեյ Նարիշկինի հայտարարությունը, թե արեւմտյան որոշ ուժեր սադրում են հայ եւ ադրբեջանցի ազգայնականներին՝ վարկաբեկելու կրակի դադարեցման մասին պայմանավորվածությունը, վերաբերում է նաեւ ԲՀԿ-ին:
«Վստահաբար, դա ուղղված չէ «Բարգավաճ Հայաստան» կուսակցությանը, եւ վստահ եմ, որ ուղղված չէ նաեւ 17 կուսակցություններին: Ճիշտ հակառակը, դա ուղղված է այն ուժերին, որոնք, այո՛, սպասարկել են արեւմտյան ուժերի շահը, դավաճանեցին հայկական շահը եւ ստորագրեցին այս կապիտուլյացիայի փաստաթուղթը: Վստահաբար, խոսքը դրա մասին է: Եվ փորձել ինտրիգ մտցնել ԲՀԿ-ի եւ Ռուսաստանի Դաշնության մեր ռուս գործընկերների միջեւ չի հաջողվի: Երեկվանից ես զգում եմ՝ որոշ լրատվամիջոցներ փորձում են թեզեր տանել այդ ուղղությամբ: Նիկոլ Փաշինյանը չի տիրապետել իրավիճակին կամ տիրապետելով՝ սպասարկել է որոշ արեւմտյան ուժերի եւ դավաճանել հայի շահը»,- ասաց պատգամավոր Շաքե Իսայանը: