Մենք մեր ժողովրդից թաքցնելու ոչինչ չունենք, խնդրում ենք վստահել պաշտոնական տեղեկատվությանը, պաշտոնական աբյուրներին:
Այս մասին Միասնական տեղեկատվական կենտրոնում հայտարարեց ՊԲ ներկայացուցիչ Սուրեն Սարումյանն ու նշեց, որ ադրբեջանական կողմը կարողացել է ներթափանցել որոշ ուղղություններում Արցախի բուն տարածք:
«Այն հատվածներում, որոնք համարվում են անվտանգության գոտի, մեր նահանջը պայմանավորված է եղել մարտավարական նկատառումներով:
Այսինքն, երբ գործ ունենք հարթավայրային տարածքի հետ, իսկ ավելի նպաստավոր բնագծեր կարելի է զբաղեցնել բարձունքներում, ապա ավելի նպատակահարմար է եղել զբաղեցնել բարձունքները՝ հակառակորդի գործողություններին առավել արդյունավետ հակազդելու, խոցելու համար:
Մարտական գործողությունների տրամաբանությունը ենթադրում է գործողությունների զարգացում, որոշակի ժամանակահատված, որի ընթացքում տեղի են ունենում այդ գործողությունները: Ուստի, մարտական գործողությունների արդյունքների մասին հնարավոր է խոսել դրանց ամբողջության մեջ, երբ դրանք մոտենում են ավարտին, կամ արդեն ավարտվել են:
Այս առումով, ուզում եմ վստահեցնել մեր հայրենակիցներին, որ մարտական գործողությունների աշխարհագրութունը ենթադրում է նաև գաղտնիության որոշակի նկատառումներ:
Այդ պատճառով, երբեմն նպատակահարմար չէ խոսել նույնիսկ տարածքային ձեռքբերումների մասին»,-ասաց ՊԲ ներկայացուցիչը: