Ես պետք է սկսեմ ինձնից՝ Անդրանի՛կ, հանդա՛րտ եղիր, որովհետև հանդարտությունը բոլորիս պետք է: Այդ մասին ԱԺ ամբիոնից ելույթի ժամանակ ասաց Անդրանիկ Քոչարյանը:
Նա նշեց, որ իր տպավորությամբ՝ պարտադրված հրադադարից հետո ռազմական գործողությունները տեղափոխվել են ՀՀ տարածք, մինչդեռ իրականում հսկայական անելիքներ կան՝ թե՛ քաղաքական դաշտի ներդաշնակությունը կառուցելու, թե՛ քաղաքական հարթակում խնդիրների լուծումը գտնելու առումով:
«Պատերազմը պետք է դադարեցնել Հայաստանի տարածքում: Լինե՛նք հանդարտ: Մենք անընդհատ կարող ենք մեղադրել... չեմ ուզում քննարկենք Փաշինյանի հրաժարականի հարցը, բայց պետք է քննարկենք այն ճանապարհային քարտեզը, որով պետք է հասնենք ներդաշնակման, որովհետև այս բարոյալքման պրոցեսի տակից միասին ենք դուրս գալիս: Մեր զինուժը ստացել է այնպիսի հարված, որ մենք ունենք առաջնահերթ խնդիր՝ փրկել զինուժի փշրանքները, որովհետև առանց դրա չենք կարող դիմակայել ապագա մարտահրավերներին: Պարտադրված հրադադարը մեզ հնարավորություն է տվել փրկել այդ փշրանքները»,- ընդգծեց Քոչարյանը: