Արցախում ռուսաստանյան խաղաղապահ զորախմբի մարդասիրական արձագանքման կենտրոնի սպաները նախօրեին հանձնել են մարդասիրական օգնության հերթական խմբաքանակը:
Այս մասին հայտնում են ՌԴ պաշտպանության նախարարությունից:
«Ռուսաստանյան խաղաղապահները Շոշ և Պառավաթումբ ավանների մանկաբարձաֆելդշերական կետերին են փոխանցել առաջին բուժօգնություն ցուցաբերելու համար նախատեսված բժշկական սարքավորումների հավաքածուներ։ Վերջին երկու շաբաթվա ընթացքում Արցախի բժիշկներին է փոխանցվել բժշկական սարքավորումների շուրջ 50 հավաքածու։ Մարտակերտի շրջանային հիվանդանոց հետագա բաշխման համար հանձնվել է 33 հավաքածու»,- նշում են ՌԴ ՊՆ-ից։
Խաղաղապահները բժշկական սարքավորումները տեղափոխել են Խնձրիստան, Աստղաշեն, Պատարա, Դահրավ, Այգեստան, Դաշուշեն, Ասկերանի, ինչպես նաև Մարտունու շրջանի այլ բնակավայրեր:
Ռուսաստանի Դաշնության պաշտպանության նախարարության միջազգային ականազերծման կենտրոնի մասնագետները շարունակում են Լեռնային Ղարաբաղում ականազերծման և պայթյունավտանգ իրերի հայտնաբերման ու վնասազերծման աշխատանքները:
Ռուսաստանյան խաղաղապահները մեկ օրվա ընթացքում ականազերծել են 7 հա տարածք, 3 կմ ճանապարհ և 10 շինություն:
«Ընդհանուր առմամբ, 2020 թ. նոյեմբերի 23-ից չպայթած զինամթերքից մաքրվել է 2 071 հա տարածք, 635,3 կմ ճանապարհ, 1 743 շենք-շինություն, այդ թվում՝ 30 սոցիալական նշանակության օբյեկտներ, հայտնաբերվել և վնասազերծվել է 25 606 պայթունավտանգ առարկա»,- ասված է հաղորդագրությունում:
Ռուսաստանի Դաշնության նախագահի 2020 թվականի նոյեմբերի 10-ի հրամանագրով Լեռնային Ղարաբաղում տեղակայվել է ռուսաստանյան խաղաղապահների զորակազմը: Զորակազմի հիմքը կազմում է Կենտրոնական ռազմական օկրուգի 15-րդ առանձին մոտոհրաձգային բրիգադը։ Խաղաղապահների հրամանատարն է գեներալ-լեյտենանտ Ռուստամ Մուրադովը։