Ռուսաստանի Դաշնության նախագահի 2020 թվականի նոյեմբերի 10-ի հրամանագրով Լեռնային Ղարաբաղի տարածքում շարունակվում է ռուսական խաղաղապահ զորակազմի տեղակայումը: Զորակազմի հիմքը կազմում է Կենտրոնական ռազմական շրջանի 15-րդ առանձին մոտոհրաձգային բրիգադը։ Զորախմբի հրամանատարն է գեներալ-լեյտենանտ Ռ. Վ. Մուրադովը։
Ռազմատրանսպորտային ավիացիայի ինքնաթիռներով շարունակվում է անձնակազմի, սպառազինության, ռազմական և հատուկ տեխնիկայի փոխադրումը Հայաստան: Ընդհանուր առմամբ 2020 թվականի նոյեմբերի 10-ից իրականացվել է 118 չվերթ, 23-ը վերջին մեկ օրվա ընթացքում: Շարունակվում է ռուսական խաղաղապահ զորակազմի հիմնական ուժերի օպերատիվ տեղակայումը։
2020թ. նոյեմբերի 10-ից խաղաղապահ զորախմբի կազմակերպված մուտքի նպատակով Լաչինի միջանցքում տեղակայվել է յոթ ժամանակավոր դիտակետ: Երեկ 15-րդ առանձին մոտոհրաձգային բրիգադի ստորաբաժանումների կողմից ավարտվել է "հյուսիս" պատասխանատվության գոտում դիտակետերի տեղադրումը։
Ներկայում հրադադարի ռեժիմի եւ մարտական գործողությունների դադարի պահպանման նկատմամբ վերահսկողությունն իրականացնում են խաղաղապահ ստորաբաժանումները Հարավային պատասխանատվության գոտում ինը դիտակետերում եւ Հյուսիսայինում՝ ինը դիտակետերում: Ռուսական խաղաղապահ ուժերի կառավարումն իրականացվում է Ստեփանակերտում տեղակայված հրամանատարական կետից։
Հրադադարը պահպանվում է շփման գծի ողջ երկայնքով։
Ձեռք բերված պայմանավորվածությունների համաձայն ՝ Լեռնային Ղարաբաղում շարունակվում է զոհվածների մարմինների փոխանակումը ։ Այն անցկացվում է Ռուսաստանի Դաշնության խաղաղապահ ուժերի, Կարմիր Խաչի Միջազգային Կոմիտեի եւ Լեռնային Ղարաբաղի արտակարգ իրավիճակների պետական ծառայության համակարգմամբ:
Հնարավոր միջադեպերի կանխման եւ ռուս զինծառայողների անվտանգության ապահովման նպատակով կապի ուղիղ ուղիներով իրականացվում է շարունակական փոխգործակցություն Ադրբեջանի եւ Հայաստանի զինված ուժերի գլխավոր շտաբների հետ:
