Ադրբեջանը խոստովանել է, որ իրենք են հրթիռային հարված հասցրել ՀՀ օդային տարածքում գտնվող ռուսական ուղղաթիռին: Ադրբեջանի ԱԳՆ-ն այս մասին հայտարարություն է տարածել՝ նշելով, որ տեղի ունեցածը «պատահականություն» է:
Պարզաբանել են, որ սխալմունք է տեղի ունեցել, քանի որ ուղղաիթռը բավական մոտ է գտնվել հայ-ադրբեջանական սահմանին այն դեպքում, երբ ղարաբաղյան հակամարտության համատեքստում շարունակվում են ակտիվ ռազմական գործողությունները:
«Թռիչքը տեղի է ունեցել օրվա մութ ժամի, ցածր թռիչքով եւ ոչ ՀՕՊ տեսանելիության հատվածում: բացի այդ, ռուսական ուղղաթիռը նախկինում երբեւէ չէր հայտնվել հիշյալ տարածքում»,-Ria-ի փոխանցմամբ, հայտարարել են Ադրբեջանի ԱԳՆ-ից:
Նշենք, սակայն, որ ՌԴ ՊՆ-ի եւ հայկական կողմի պնդմամբ, ուղղաթիռը հարված է ստացել հայկական ժամանակով 18:30-ին, երբ այդքան էլ մութ չէ, բացի այդ, արդեն իսկ հայտարարվել է, որ ուղղաթիռը թռիչք է իրականացրել վայրում, որը չի համարվում ռազմական գործողությունների տարածք:
Ми-24 ռուսական ուղղաթիռը հրթիռային հարվածի է ենթարկվել եւ կործանվել Հայաստանի տարածքում, Երասխ բնակավայրի մոտ:
Դեպքը տեղի է ունեցել, երբ ուղղաթիռն ուղեկցելիս է եղել ռուսական 102-րդ ռազմաբազայի ավտոշարասյունը Ադրբեջանի հետ սահմանի մոտակայքում:
ՌԴ ՊՆ-ից հայտնել են, որ Ми-24-ը կրակային թիրախային հարված է ստացել զենիթահրթիռային համակարգից: Հրթիռի հարված ստանալու հետեւանքով ուղաթիռը կորցրել է կառավարումն ու ընկել Հայաստանի տարածքի լեռնոտ հատվածում:
Ըստ ՌԴ ՊՆ-ի, զոհվել է անձնակազմի 2 անդամ, եւս մեկ անդամ միջին ծանրության վնասվածքներով հոսպիտալացվել է: