Այսօր հրավիրված օնլայն ասուլիսի ընթացքում ՀՀ վարչապետ Նիկոլ Փաշինյանը հայտարարեց՝ բացարձակապես անհիմն տեղեկատվություն է, թե ռուս խաղաղապահները Շուշին ընկնելուց օրեր առաջ արդեն տեղափոխվում էին Հայաստան:
«Խաղաղապահները սկսել են տեղափոխվել հայտարարության ստորագրումից հետո», - ասաց վարչապետը։
Լրատվամիջոցներից մեկի հարցին, թե պատերազմի տարբեր փուլերում տարբեր փաստաթղթե՞ր են դրվել իր առջեւ, ընդ որում՝ բոլորն ավելի նպաստավոր պայմաններով, քան նոյեմբերի 10-ի հայտարարությունը, Փաշինյանը պաստախանեց.
«Ո՛չ, այդպիսի բան նույնպես չի եղել։ Եղել են էլի նույն տրամաբանությամբ առաջարկներ կամ եղել է պատերազմի դադարի նույն տրամաբանությունը, ինչ որ պատերազմի մեկնարկից առաջ, որ այդ տարածքները պետք է հանձնվեն Ադրբեջանին»:
Ընդ որում, ըստ վարչապետի՝ հանձնվող տարածքների թվում էր նաեւ Շուշին:
Փաշինյանն ընդգծեց՝ պատերազմից առաջ էլ է այդպես եղել։
«Այդպես է եղել 2016 թվականից, եւ 2016-ի ապրիլյան պատերազմն այդ վերջին զանգն էր այս պատմության, այն տարբերությամբ, որ այս անգամ արդեն որեւէ բանավոր հայտարարությամբ կամ պարտավորությամբ հնարավոր չէր լինի կանգնեցնել պատերազմը»,- ասաց Փաշինյանը՝ ակնարկելով, որ 2016-ին պատերազմը կանգնեցվել է հենց այդպես:
Նրա համոզմամբ՝ 1998-ից սկսած բանակցային բովանդակության մեջ եղել է մի թեմա, որը եղել է չափելի: Խոսքը տարածքները Ադրբեջանին հանձնելու մասին է: Եվ հայկական կողմի քաղաքականությունը եղել է ձգել ժամանակը, ինչն անվերջ անել հնարավոր չէր:
Եվ հենց սա է եղել պատճառը, որ ըստ վրաչապետի՝ ինքը փորձել է բանակցություններում նոր տրամաբանություն դնել, ինչը չի հաջողվել: