Շաբաթ օրը Դանիայի ֆուտբոլի ազգային հավաքականը Եվրոպայի առաջնության քառորդ եզրափակչում Ադրբեջանի մայրաքաղաքում կխաղա Չեխիայի ընտրանու դեմ: Խաղին ընդառաջ՝ Amnesty International իրավապաշտպան կազմակերպությունը Դանիայի ֆուտբոլային ասոցիացիայի ուշադրությանն է ներկայացրել 5 փաստ Ադրբեջանի մասին:
1. Քննադատներին հետապնդում և բանտարկում են
Ավտորիտար ռեժիմը ճնշում է քննադատության բոլոր դրսևորումները, իսկ իրավապաշտպաններին ու կառավարության քննադատներին ստիպում են լռել: Ոմանք ազատազրկվել են, ոմանք էլ լքել են երկիրը, շատերը չեն համարձակվում ազատ խոսել՝ վախենալով ձերբակալումից կամ հետապնդումից:
Իշխանությունները փորձում են լռեցնել աքսորյալ քննադատներին՝ հալածելով Ադրբեջանում մնացած ընտանիքի անդամներին:
Լրատվամիջոցների մեծ մասը կամ վերահսկվում է կառավարություն կողմից, կամ կառավարության քաղաքականության ջատագովն է, և իշխանություններն օգտագործում են մամուլի և հեռուստատեսության նկատմամբ վերահսկողությունը՝ իրենց քննադատողներին արատավորելու համար:
2. Ցույցերն արգելում են կամ ցրում են բռնի ուժով
Իշխանությունները չեն հանդուրժում, որ մարդիկ մեծ խմբերով հավաքվեն՝ իրենց տեսակետները հայտնելու համար, և ինչպես COVID-19 համաճարակը, այնպես էլ հայերի դեմ պատերազմը որպես պատրվակ օգտագործվել են ցույցերն արգելելու և ցրելու համար: Ոստիկանությունը սիրում է ջրցան մեքենաներ օգտագործել խաղաղ ցուցարարների դեմ, որոնց ծեծում ու ձերբակալում են, եթե նրանք համարձակվում են հավաքվել և բողոքել ռեժիմի դեմ: Լրագրողներն արժանանում են նույն վերաբերմունքին:
3. Հասարակական կազմակերպությունները վտարվել են երկրից
Հավաքների ազատությունը վտանգված է, և 2015 թվականին քաղաքացիական հասարակության մի շարք այլ միջազգային կազմակերպությունների հետ մեկտեղ Amnesty-ն դուրս մղվեց երկրից: Մոտ 20 տեղական իրավապաշտպան հասարակական կազմակերպությունների ստիպեեցին փակել իրենց գրասենյակները:
4. Խոշտանգումներ և վատ վերաբերմունք
Իշխանություններն ու բանտերի աշխատակիցներն օգտագործում են խոշտանգումները և դաժան վերաբերմունքի այլ ձևեր կալանավորներից և բանտարկյալներից տեղեկատվություն և «խոստովանություններ» կորզելու համար:
Հայկական ուժերի դեմ պատերազմի հետ կապված բողոքի ցույցից հետո բանտարկված ցուցարարները պահվել են գերբնակեցված, շոգ սենյակներում՝ առանց օդափոխության և սննդի ու խմիչքի սահմանափակության պայմաններում: Նրանց ենթադրաբար ծեծի և բռնության են ենթարկել, ինչպես նաև մերժել են կապ հաստատել փաստաբանների և ընտանիքների հետ:
5. Պատերազմական հանցագործություններ Լեռնային Ղարաբաղում
Amnesty- ն փաստում է, որ ադրբեջանական ուժերը 2020 թվականին Լեռնային Ղարաբաղում հայերի դեմ պատերազմում ռազմական հանցագործություններ են կատարել: Մի շարք ստուգված տեսանյութեր ցույց են տալիս ռազմագերիների և այլ ձերբակալվածների նկատմամբ վատ վերաբերմունքը, գլխատումներն ու զոհված զինծառայողների մարմինների պղծումը:
