«Այո՛, ես լինելու եմ ՔՊ ներկայացուցիչը Սահմանադրական դատարանում, և ընտրություններն անվավեր ճանաչելու որևէ հիմք չկա»: Այսօր Կառավարության նիստից հետո լրագրողների հետ զրույցում հայտնեց արդարադատության նախարարի պաշտոնակատար Ռուստամ Բադասյանը:
Ինչպես արդեն հայտնել էինք, սեփական դիմումի համաձայն եւ Սահմանադրական դատարանի աշխատակարգային որոշմամբ՝ «Քաղաքացիական պայմանագիր» կուսակցությունը հունիսի 20-ի արտահերթ ընտրությունների արդյունքները վիճարկելու գործով ներգրավվել է որպես երրորդ անձ:
ՀԺ-ն երեկ գրել էր, որ ՔՊ-ի դիրքորոշումը ՍԴ-ում կներկայացնեն ՀՀ արդարադատության նախարարի պաշտոնակատար Ռուստամ Բադասյանը եւ փոխնախարարի պաշտոնակատար Սուրեն Գրիգորյանը:
«Մենք կարող ենք անել ընդամենը մեկ պարզ վարժություն: ԵԱՀԿ ԺՄԻԳ-ի նախնական եզրակացությունները կարող ենք բացել, կարդալ, թե այնտեղ ինչ գնահատական է տրվում ընտրություններին և համեմատել, օրինակ, 2017 թվականի կամ դրանից առաջ տեղի ունեցած ընտրությունների գնահատականների հետ: Կտեսնեք, թե ինչ էական տարբերություն է լինելու»,- նշեց Ռուստամ Բադասյանը:
Նրա կարծիքով՝ վերջին ընտրությունները եղել են ժողովրդավարության լավագույն չափանիշներին համապատասխան, անցել են արդար մրցապայքարում. «Այս ընտրությունների կապակցությամբ բոլորս պետք է իրար շնորհավորենք, որովհետև սա իշխանության կամ ընդդիմության ձեռքբերումը չէ, սա բոլոր քաղաքացիների ձեռքբերումն է»,- եզրափակեց արդարադատության նախարարի պաշտոնակատարը:
Հավելենք, որ Սահմանադրական դատարանում ընտրությունների արդյունքների վիճարկման հարցով 2 դաշինքների եւ 2 կուսակցությունների («Հայաստան», «Պատիվ ունեմ» դաշինքներ, «Զարթոնք», «Հայոց Հայրենիք» կուսակցություններ) միավորված դիմումի քննարկումը սկսվելու է վաղը՝ հուլիսի 9-ին, եւ կարող է շարունակվել մինչեւ հուլիսի 17-ը: ՍԴ որոշումից կախված էլ կձևավորվի նոր խորհրդարանը, այնուհետև՝ Կառավարությունը: